2024-ը դոկտոր Հրայր Ճէպէճեանին համար գործունէութեամբ զեղուն ամէնէն աշխուժ տարիներէն մէկը եղաւ հաստատաբար: Եթէ միայն նշենք իր վերջին՝ «Հայկական ազգագրական պատկերներ՝ տեսիլք, կամք եւ յոյս» հատորի շնորհահանդէսներուն նուիրուած ձեռնարկները՝ Լիբանանի, Աւստրալիոյ, Կրէտէի, Թորօնթոյի, Մոնրէալի, Լոս Անճելըսի, Պոլսոյ, Լոնտոնի, Յունաստանի, Հայաստանի մէջ, ապա յստակ կը դառնայ մեր խօսքին իրաւացիութիւնը:
Մենք քաջ կը հաւատանք, որ դոկտորը պիտի շարունակէ իր համահայկական եռանդուն աշխատանքները ե՛ւ մամուլին, ե՛ւ աշխարհասփիւռ տարածքի հայկական գաղութներուն մէջ: Այս իմաստով, խորապէս ուրախացանք, երբ 2025-ի իր գործունէութեան երկար ցանկին վրայ առաջնային տեղ գրաւեց «Արարատ»-ի խմբագրատուն կատարած այցը՝ անցեալ Շաբաթ օր:
Տնօրէնութեան հասցէին շնորհաւորական խօսքեր լսեցինք յարգարժան դոկտորէն: Նաեւ՝ գնահատական խօսքեր 2025-ի «Բացառիկ»-ի տեսքին եւ բովանդակութեան մասին: «Կը շնորհաւորեմ, դուք Լիբանանի այս ահաւոր օրերուն մէջ կրցաք պահել թերթը», ըսաւ դոկտոր Ճէպէճեան եւ իմացաւ թերթին յայտնի եւ անյայտ դժուարութիւններուն մասին, եւ ծանօթացաւ անոնց համար «Արարատ»-ցիներուն որդեգրած դեղամիջոցներուն:
Աստուածաշունչի Ընկերութեան միջինարեւելեան երկիրներու ներկայացուցիչին հետ մեր զրոյցը սրտբաց էր եւ օգտաշատ: Հետաքրքրուեցանք դոկտորին հետագայ ծրագրերուն մասին: Լսեցինք ուշագրաւ դրուագներ՝ վերջին գիրքի շնորհահանդէսներէն:
Այցի աւարտին, դոկտոր Հրայր Ճէպէճեան յաջողութիւն մաղթեց «գաղութը արթուն պահող, զգաստացնող բազկերակը եւ անոր հիմքերէն մին հանդիսացող» մամուլի ներկայացուցիչներէն՝ «Արարատ»-ին:
