Գլխաւորութեամբ Հայ երեք յարանուանութիւնները ներկայացնող եկեղեցականներու, երէկ տեղի ունեցաւ Քրիստոսի ծննդեան աւետման միացեալ աղօթքի եւ երգեցողութեան արարողութիւն Ճինիշեան եւ Գարակէօզեան, տնօրէնուհի տիկին Քրիսթին Դանիէլեանի արտայայտութեամբ՝ քոյր հիմնարկներուն մէջ:
«Արարատ» սիրով ընդառաջած էր Ճինիշեան հաստատութեան տնօրէնութեան կողմէ յղուած հրաւէրին, ուր որոշեալ ժամուն, Տէր Սարգիս Ա. քհնյ. Սարգիսեան, հայր Սահակ վրդ. Քէշիշեան եւ վերապատուելի Ռաֆֆի Մսրլեան հիմնարկին, անոր պաշտօնէութեան, բարերարներուն եւ հիւրաբար ներկայ գտնուողներուն դիմեցին տնօրհնէքի աղօթքով եւ օրհնեցին աղ ու հացն ու ջուրը:
Հաճելի անակնկալ մը վերապահուած էր ներկաներուն, երբ Հայ Առաքելական եղբայրակցութեան խմբակը, գլխաւորութեամբ պարոն Համբիկ Թորոսեանի, երգեցողութեամբ ու նուագով աւետեց Յիսուս Մանուկի ծնունդը:
Ներկաները հիւրասիրութեամբ պատուելէ անմիջապէս ետք, Հաուըրտ Գարակէօզեան բարեսիրական հաստատութեան տնօրէն Սերոբ Օհանեան ներկաները հրաւիրեց «Գարակէօզեանի» մէջ կայանալիք տնօրհնէքին:
Հոն եւս բարձրացան աղօթքներ՝ վարդապետին, վերապատուելիին եւ Տէր Ղեւոնդ քհնյ. Լոշխաճեանին կատարողութեամբ, իսկ աւետման երգեցողութեամբ ու նուագով՝ Հայ Առաքելական եղբայրակցութեան կողմէ, հիմնարկի աշխատակազմին բարերարներուն ու ներկաներուն համար:
