Կիպրոսի նախագահը արտերկրացի առաջին բարձրաստիճան պաշտօնատարն էր, որ երէկ ժամանեց Պէյրութ եւ շնորհաւորեց նախագահ Աունի ընտրութիւնը: Պաապտայի պալատին մէջ իր կիպրացի պաշտօնակիցին հետ տեսակցութեան ընթացքին նախագահ Աուն շեշտեց հարաւի բռնագրաւեալ շրջաններէն իսրայէլեան ուժերու ամբողջական նահանջին կարեւորութիւնը: Աւելի ուշ Պաապտայի պալատ այցելեց նաեւ Իտալիոյ արտաքին գործերու նախարարը ու յայտնեց, թէ նոր նախագահի ընտրութիւնը Լիբանանի կայունութեան երաշխիքն է, կոչ ուղղելով ամրապնդելու զինադադարի համաձայնութիւնը: Իտալիոյ արտաքին գործերու նախարարը Աունին տեսակցելէ ետք նոր նախագահի ընտրութիւնը համարեց Լիբանանի եւ Միջին Արեւելքի մէջ կարեւոր իրագործում մը, համոզում յայտնելով, որ Աունի իշխանութեան օրերուն Լիբանան պիտի յաջողի խաղալ իր արժանի դերը: Նախարարը Հռոմի աջակցութիւնը յայտնեց նոր նախագահին ու Պէյրութին, խոստանալով կարեւոր դեր խաղալ նաեւ ԵՈՒՆԻՖԻԼ-ի մէջ: Իսկ վարչապետ Ճորճիա Մելոնի վստահեցուց, որ «Աուն պիտի յաջողի անվտանգ իշխել Իտալիոյ գործընկեր եւ բարեկամ համարուող Լիբանանի մէջ»: Իրանի նախագահը շնորհաւորեց Աունը եւ նշեց, որ կայունութեամբ ու միասնականութեամբ կարելի պիտի ըլլայ տապալել իսրայէլեան դաւերը: Միացեալ Նահանգներու նախագահ Ճօ Պայտըն իր երկրին մնայուն աջակցութիւնը յայտնեց Լիբանանին, խոստանալով զանազան ոլորտներու մէջ կանգնիլ նախագահ Աունի կողքին: Նախագահին ընտրութիւնը ողջունեցին եւ շնորհաւորեցին նաեւ Յորդանանի, Եգիպտոսի, Ֆրանսայի, Քաթարի, Էմիրութիւններու, Սէուտական Արաբիոյ եւ բազմաթիւ երկիրներու ղեկավարները: Հայաստանի վարչապետ Նիկոլ Փաշինեան շնորհաւորական ուղերձին մէջ շեշտեց, թէ Հայաստան յանձնառու կը մնայ Լիբանանի հետ բարեկամական յարաբերութիւններուն, խոստանալով շարունակաբար աշխատանք տանիլ Լիբանանի կայունութեան պահպանումին մէջ՝ մանաւանդ ԵՈՒՆԻՖԻԼ-ի խողովակով: Աունին ընտրութիւնը մեկնաբանեց նոյնիսկ Իսրայէլի արտաքին գործերու նախարարը: Ան մաղթեց, որ Լիբանանի մէջ նախագահի ընտրութիւնը իրականացնէ կայունութիւն: Իսկ ՄԱԿ-ի ընդհանուր քարտուղար Անթոնիօ Կութերեշ շնորհաւորեց Աունը եւ կոչ ուղղեց արագօրէն կազմելու նոր կառավարութիւնը: Human Rights Watch իրաւապաշտպան կազմակերպութիւնը իր կարգին շեշտեց, թէ Աունի իշխանութիւնը պիտի արժեւորէ իր կատարելիք գործերուն ընդմէջէն:
