Լիբանանցիները 9 Յունուարին ստացան Ամանորի ուշացած նուէր մը, երբ խորհրդարանը հանրապետութեան նախագահ ընտրեց բանակի հրամանատար զօրավար Ժոզէֆ Աունը: Ընտրութիւնը յաջողեցաւ երկրորդ փուլին, երբ Աուն ստացաւ 99 երեսփոխաններու աջակցութիւնը: Ան իր երդմնակալութեան ուղերձին մէջ շեշտեց, որ պետութիւնը պէտք է ունենայ զէնք կրելու եւ գործածելու մենաշնորհ, խոստանալով վերականգնել իսրայէլեան պատերազմին հետեւանքները եւ պաշտպանել դրամատնային աւանդատէրերուն իրաւունքները: Լիբանանի քաղաքական կեանքի բնականոնացումին երկրորդ քայլը նոր վարչապետի նշանակումն է, ապա՝ կառավարութեան կազմութիւնը: Այս ուղղութեամբ, նախագահ Աուն երէկ երեսփոխանները հրաւիրեց վարչապետ անուանելու պարտադիր խորհրդակցութեանց, որ տեղի պիտի ունենայ Երկուշաբթի օր:
