Զանազան հաստատութիւններու, միութիւններու եւ անհատ բարեկամներու տրուած շնորհաւորական աւանդական այցելութիւններուն շարքին, Նոր Հաճնոյ Սուրբ Գէորգ եկեղեցւոյ թաղականութեան պատուիրակութիւն մը Նոր Տարուան նախօրէին այցելեց նաեւ «Արարատ»-ի խմբագրատուն:
Տնօրէնութեան հանդիպումը յարգարժան թաղականներ՝ Վաչէ Պարախեանի եւ Սահակ Պիտինեանի հետ առիթ հանդիսացաւ վերստին իրազեկ դառնալու եկեղեցւոյ եւ մամլոյ գլխաւոր դժուարութիւններուն եւ լսելու անոնց դարմանումին համար նախատեսուած քայլերուն մասին:
Ամանորեան աւանդական շնորհաւորական խօսքերէն անդին, «Արարատ»-ի տնօրէնութիւնը շնորհակալութիւն յայտնեց թաղական անդամներուն՝ իրենց կատարած այցին համար, նաեւ յաջողութիւն մաղթեց յառաջիկայ տօնական օրերու եկեղեցանուէր գործունէութեանց համար: Յարգելի այցելուներն ալ «Արարատ»-ին մաղթեցին բարգաւաճում եւ հնարաւոր միջոցներով թերթին առաւելագոյնս նպաստելու պատրաստակամութիւն:
