Նուազ քան երեք շաբաթ ետք կը սպառի հարաւի մէջ ամերիկեան միջնորդութեամբ յայտարարուած երկամսեայ զինադադարը, որուն աւարտին իսրայէլեան ուժերը պէտք է քաշուած ըլլան իրենց ներթափանցած լիբանանեան հողերէն, իսկ Հըզպալլա պէտք է նահանջած ըլլայ Լիթանի գետէն հիւսիս, որպէսզի ամբողջանայ լիբանանեան բանակին տեղակայումը հարաւային գաւառներուն մէջ: Այսուհանդերձ, իսրայէլեան խախտումները տակաւին կը շարունակուին՝ թիրախաւորելով սահմանամերձ բնակավայրերը: Ռմէյշի մէջ երէկ դատարկուեցաւ քաղաքացիական անվտանգութեան կեդրոնը, որուն մերձակայքը ենթարկուեցաւ ռմբակոծումի: Իսրայէլեան ուժերը հրաձգութեան թիրախ դարձուցին եւ պայթեցուցին բնակարաններ եւ այլ կառոյցներ նաեւ Պընթ Ժպէյլ, Մարուն էլ Ռաս, Պենի Հայան, Հուլա եւ այլ բնակավայրերու մէջ, մինչ սահմանային Մէյս էլ Ժապալի մէջ ձերբակալուեցան երեք սուրացի: Իսրայէլեան ուժերը նահանջելէ առաջ գրեթէ ամբողջութեամբ կործանած են Ալմա Շաապ գիւղը, ծանր վնաս պատճառելով նոյնիսկ Սուրբ Աստուածածին եկեղեցւոյ: Իսրայէլեան բանակի հիւսիսային շրջանի հրամանատարութիւնը յայտարարեց, թէ պիտի արգիլէ Հըզպալլայի հարաւային Լիբանան վերադարձն ու տեղակայումը սահմանային գօտիին վրայ, խոստանալով հակադարձել որեւէ խախտումի:
