Ամերիկացի պատուիրակ Հոքշթայն նախանցեալ օր խումբ մը երեսփոխաններու հետ տեսակցեցաւ վարչապետի հաւանական թեկնածու, երեսփոխան Ֆուատ Մախզումիի բնակարանին մէջ ու տեղեկացուց, թէ Լիբանան կը գտնուի ոսկէ առիթի առջեւ, աւելցնելով որ բանակի հրամանատարը կը վայելէ Լիբանանին աջակցող ուժերուն զօրակցութիւնը: Պըրրիի գլխաւորած «Ազատագրութիւն եւ բարգաւաճում» խմբակցութիւնը իր երէկուայ նիստէն ետք յայտնեց, թէ որպէս սկզբունք կը պահանջէ համաձայնիլ հանրապետութեան նախագահի ինքնութեան շուրջ: Իսկ երեսփոխան Մոհամմատ Ռաատի գլխաւորած պատուիրակութիւնը ֆրանսացի պատուիրակին հետ տեսակցութեան ընթացքին յստակացուց, թէ Հըզպալլա պիսի չխոչընդոտէ լիբանանցիներուն համախոհութեան արժանացած ոեւէ թեկնածուի նախագահ ընտրութիւնը:
Մարոնի եպիսպոկոսներու խորհուրդը երէկ գումարած իր ամսական նիստին ընթացքին կոչ ուղղեց ազգային զարթօնքի մը, որ կ’արդիւնաւորուի հանրապետութեան նոր նախագահի ընտրութեամբ, որպէսզի Լիբանան վերստանձնէ իր տարածաշրջանային առաքելութիւնը:
