Հանրապետութեան նախկին նախագահ Միշէլ Աունի պաշտօնավարութեան աւարտով Պաապտա պալատի երկամեայ դատարկութենէն եւ հանրապետութեան նոր նախագահի ըտնրութեան նիստերու երկարատեւ խափանումէ ետք, լիբանանցիներուն եւ Լիբանանով հետաքրքրուած արտաքին ուժերուն հայեացքները այսօր կ’ուղղուին կեդրոնական Պէյրութի Նըժմէ հրապարակ, ուր սկզբունքով տեղի պիտի ունենայ նախագահի ընտրութեան խորհրդարանական լիագումար նիստ՝ խորհրդարանի նախագահ Նեպիհ Պըրրիի հրաւէրով: Այսուհանդերձ, մինչեւ արեւածագի առաջին ժամերը տակաւին չէր վերջնականացած թէ՛ նիստի գումարումին, թէ՛ ընտրական հոլովոյթին ճակատագիրը, նկատի առնելով նախագահի ինքնութեան շուրջ նախօրօք համաձայնութիւն գոյացնելու լիբանանեան սովորութիւնը եւ խորհրդարանի նախագահին պնդումը: Երէկ գիշերուայ դրութեամբ, բոլոր նշանները ցոյց կու տային, թէ լիբանանեան բանակի հրամանատար զօրավար Ժոզէֆ Աուն կը վայելէ նախագահ դառնալու մեծագոյն հնարաւորութիւնը, թէեւ անոր ընտրութիւնը պայմանաւորուած է սահմանադրական որոշ պատշաճեցումով: Իր վայելած տեղական աջակցութեան կողքին, Աունի ընտրանքով հետաքրքրուած կ’երեւին մասնաւորաբար Միացեալ Նահանգներու, Ֆրանսայի եւ Սէուտական Արաբիոյ նման միջազգային ուժեր, որոնք միշտ մօտէն առնչուած են լիբանանեան քաղաքական զարգացումներուն: Խորհրդարանի ընտրական նիստին մասնակցելու եւ նախագահի ընտրութիւնը յաջողցնելու նպատակով, Լիբանան ժամանած են Ֆրանսայի նախագահական պատուիրակ Ժան Իվ Լը Տրիանը, ամերիկացի բանացնաց Ամուս Հոքշթայնը եւ Սէուտական Արաբիոյ մէջ լիբանանեան թղթածրարի պատասխանատու Եազիտ պըն Ֆարհան իշխանը: Նշեալ երեք անձնաւորութիւնները անցնող երեք օրերուն տեսակցութիւններ ունեցան լիբանանեան բարձրաստիճան բոլոր պաշտօնատարներուն եւ քաղաքական գլխաւոր ուժերուն հետ՝ քննարկելու նախագահի ընտրութեան հարցը եւ Լիբանանին աջակցելու հնարաւորութիւնները:
Վարչապետի պաշտօնակատար Նեժիպ Միքաթի յայտնեց, որ նախագահի պաշտօնը թափուր մնալէն ետք առաջին անգամ ըլլալով ուրախ է, այն յոյսով, որ այսօր կ’ընտրուի նոր նախագահը: Զօրավար Աունի ընտրութիւնը հարթելու կարեւոր քայլերէն էր Մարատա հոսանքի նախագահ Սլէյման Ֆրանժիէի թեկնածութեան յետս կոչումը եւ Աունին աջակցութիւնը, ինչպէս նաեւ մէկ այլ թեկնածու՝ Զիատ Պարուտի ընտրապայքարէն հրաժարիլը: Զօրավար Ժոզէֆ Աունին իրենց աջակցութիւնը յայտնեցին Փաղանգաւոր կուսակցութիւնը, «Ազգային չափաւորականութեան պլոք»-ը, «Փոփոխութեան պլոք»-ի շարք մը անդամներ, Ժողովրդավարական հանդիպումը, «Ազգային համախոհութեան համախմբում»-ը, ինչպէս նաեւ անկախ երեսփոխաններ: Իսկ Լիբանանեան ուժեր կուսակցութեան նախագահ Սամիր Ժաաժա շեշտեց, թէ իրենք պիտի աջակցին Աունին, եթէ Հըզպալլա եւս կայացնէ նոյն որոշումը:
