Նոր տարուայ առիթով, Հայաստանի վարչապետ Նիկոլ Փաշինեան ուղերձ յղեց ժողովուրդին, որուն մէջ յայտնեց, թէ պատմական իրադարձութեամբ, իրական Հայաստանի գաղափարախօսութիւնը ժողովուրդին առջեւ է եւ կ’առաջարկէ այլ դիտարկումէ նայիլ Հայրենիքին, տարածաշրջանին ու աշխարհին: «Իրական Հայաստանը խաղաղութեան օրակարգին հիմնաւորումն է եւ կարելի չէ խաղաղութեան հասնիլ, առանց իրական Հայասատանի գաղափարախօսութեան», ըսաւ վարչապետը: Ան պատմական կարեւոր իրադարձութիւն եւ անկախութեան, անվտանգութեան ու բարեկեցութեան կարեւոր անկիւնաքար համարեց սահմանազատումի հոլովոյթին սկիզբը, վստահութիւն յայտնելով, թէ մնացեալ բոլոր խնդիրները եւս պիտի ստանան իրենց խորքային լուծումը: Փաշինեան 2024 թուականը համարեց նաեւ վերջին քսան տարուայ ամէնէն խաղաղ եւ հանգիստ տարին, կոչ ուղղելով խորութեամբ վերլուծելու այդ իրականութիւնը:
Հայաստանի վարչապետը 3 Յունուարին ժողովուրդը շնորհաւորեց նաեւ 2025 թուականի աշխատանքային առաջին օրուայ առիթով: «Աշխատող, արդիւնք տուող, օրէնքով սահմանուած տուրքերը վճարող քաղաքացին Հայաստանի թիւ մէկ հերոսն է», գրեց վարչապետը համացանցի ընկերային հաղորդակցութեան հարթակներուն վրայ:
Իսկ Ամանորի գիշերը, Մայր տաճարին, ապա Սուրբ Տրդատ բաց խորանին մէջ տեղի ունեցաւ Հանրապետական մաղթանք եւ նռնօրհնէք, հանդիսապետութեամբ Վեհափառ Հայրապետին: Գարեգին Բ. կաթողիկոսը Ամանորի առթիւ ընդունեց նաեւ արցախցի երիտասարդ ընտանիքները: Ան հաւաստիացուց, թէ Հայ եկեղեցին միշտ իրենց կողքին պիտի մնայ:
Կիրակի, 5 Յունուարին պիտի մատուցուի Սուրբ Ծննդեան ճրագալոյցի Սուրբ Պատարագը: Մայր Աթոռ Սուրբ Էջմիածնի մէջ այդ պատարագը պիտի մատուցէ Արցախի թեմի առաջնորդ Վրթանես եպս. Աբրահամեանը: Իսկ «Սրբազան պայքար» ընդդիմադիր շարժումի ղեկավար Բագրատ արք. Գալստանեան Ամանորին այցելեց Եռաբլուր, ուրկէ յայտարարեց, թէ ուխտով գացած է այնտեղ՝ «ազատագրելու մեր երկիրը եւ վերացնելու չարիքը մեր կեանքէն»
Իսկ 2 Յունուարին, Մեծի Տանն Կիլիկիոյ Արամ Ա. կաթողիկոսին շնորհաւորական այցելութիւն տուաւ Լիբանանի մէջ պապական նուիրակը՝ փոխանցելու Հռոմի Ֆրանչիսկոս պապին շնորհաւորական նամակը: Տեսակցութեան ընթացքին քննարկուեցան լիբանանեան գլխաւոր նիւթերը՝ ներառեալ հանրապետութեան նոր նախագահի ընտրութեան թղթածրարը:
