Եմէնի մէջ իշխող հուսիներու Անսարալլա կազմակերպութեան բանբեր Եահիա Սարիհ յայտնեց, որ հեռահար երկու հրթիռ արձակուած է Թել Աւիւի շրջանին մէջ գտնուող երկու թիրախներու ուղղութեամբ: Իսրայէլեան լրատուամիջոցներ միւս կողմէ հաղորդեցին, թէ եմէնեան հրթիռներուն պատճառով շուրջ հինգ միլիոն քաղաքացի խուճապահար դիմած է ապաստան: Իսկ իսրայէլեան իշխանութիւնները նշեցին, թէ հրթիռները ինկած են բաց շրջաններու մէջ:
Համասի «Քասսամ» զինեալ թեւը մինչ այդ յայտարարեց, թէ Կազայի կեդրոնական հատուածին վերեւ հակաօդային պաշտպանութեան հրթիռ մը արձակած է իսրայէլեան ուղղաթիռի ուղղութեամբ, մինչ իսրայէլեան բանակը յստակացուց, թէ հրթիռը չէ վտանգած ուղղաթիռը:
