Կազմակերպութեամբ Լիբանանի Ընկերվար յառաջդիմական կուսակցութեան Երիտասարդական դիւանին, Չորեքշաբթի, 18 Դեկտեմբերի յետիջօրէին, տեղի ունեցած է հանդիպում մը Լիբանանի կրթութեան եւ բարձրագոյն ուսումի նախարար Ապպաս Հալապիի հետ, նախարարութեան ընդունարանին մէջ:
Հանդիպման մասնակցելու հրաւէրին ընդառաջած են Լիբանանի մէջ գործող երիտասարդական կամ ուսանողական միութիւններէն շատերը: Ընկերուհի Մարի-Անն Յովաննէսեան եղած է Ս.Դ.Հ.Կ.-ի «Տխրունի» ուսանողական երիտասարդական միութեան ներկայացուցիչը:
Ժողովականները քննարկած են վերջին ամիսներուն երկրին մէջ ստեղծուած իրադարձութիւններու լոյսին տակ կրթական տարեշրջանը փրկելու տրամաբանական լուծումները, ինչպէս նաեւ կրթութեան վերաբերող ընդհանուր հարցերը՝ սկսած դպրոցներէն մինչեւ համալսարանները ընդհանրապէս, եւ պետական համալսարանը՝ յատկապէս:
Նախարարը ներկայացուցած է ընթացիկ ուսումնական տարուան համար նախարարութեան ծրագիրը, իսկ ժողովական ներկայացուցիչները խօսած են աշակերտները, ուսանողներն ու ուսուցիչները յուզող խնդիրներուն, Սուրիայէն վերադարձող համալսարանականներուն եւ այլ հարցերու մասին։
Ներկաները մաղթած են, որ այս հանդիպումը կրկնուի յառաջիկային։
