Երէկ, Ճինիշեան հաստատութեան մէջ, կարճ սակայն յիշարժան այցելութիւն մը տուինք Ճինիշեան Յիշատակի Ձեռնարկի տնօրէնուհի տիկին Քրիսթին Դանիէլեանին: Մեր այցին նպատակը ծանօթանալն էր այն գեղեցիկ ծրագիրին, որուն խորագիրն է «Երիտասարդութիւնը ընկերութեան մէջ»:
Լիբանանահայերուս ծանօթ Ճինիշեան Յիշատակի Ձեռնարկի իրագործած, յատկապէս ընկերային ծառայողական բնոյթ կրող բազմատեսակ ծրագրերու կողքին, այս մէկը կարեւոր նորութիւն մը գտանք եւ օգտաշատ ձեռնարկ մը՝ յատկապէս ապագայ սերունդի ընկերային կեանքին հետ առնչուող, ուստի կարեւորեցինք անձամբ հետաքրքրուիլ ու մամուլի շրջագիծէն ներս մեր աջակցութիւնը յայտնել: Ծրագիրը երիտասարդներուն մօտ կը հիմնաւորէ կառուցողական երկխօսութիւնը, խօսակիցին կարծիքը յարգելը, ինչպէս նաեւ ապագայ ղեկավարի յատկանիշերու ձեւակերպումը:
Աւելցնենք նաեւ, որ ծրագիրը ունի մրցակցային բնոյթ եւ տարբեր գաղութներու երիտասարդ տղոց եւ աղջիկներէ բաղկացած խմբակներ կը նախապատրաստուին Մարտ ամսուն Հայաստանի մէջ տեղի ունենալիք աւարտական փուլին:
Բաւարարուինք այսքանով եւ խոստանանք այս մասին ընդարձակօրէն արձագանգել յառաջիկային: Մինչ այդ, շնորհակալութիւն յայտնենք, վարձքը կատար ըսենք Ճինիշեան Յիշատակի Ձեռնարկի տնօրէնուհիին, ինչպէս նաեւ այդ կենսական հաստատութեան բոլոր աշխատակիցներուն՝ իրենց կատարած բարեսիրական-մարդասիրական զոհողութիւններուն համար:
