Սուրիոյ զինուորական համակարգումի գրասենեակի ընդհանուր հրամանատար Ահմատ Շարաա յայտնեց, որ երկրին մէջ գործող զինեալ բոլոր կազմակերպութիւնները որպէս մէկ հաստատութիւն պիտի ձուլուին նոր բանակին մէջ՝ Պաշտպանութեան նախարարութեան հովանաւորութեամբ: Ըստ Շարաայի, այս որոշումով իրենք կը միտին միաւորել զինուած ուժերը եւ անոնց գործունէութիւնը կազմակերպել պետական հաստատութիւններու ծիրին մէջ:
Շարաա երէկ նախագահական պալատին մէջ տեսակցեցաւ Քաթարը ներկայացնող պատուիրակցութիւն մը եւ իշխան Թամիմ պըն Համատին յղեց Սուրիա այցելելու հրաւէր: Պատրաստականութիւն յայտնուեցաւ աջակցութիւն տրամադրելու նոր իշխանութեան, իսկ Շարաա խօսեցաւ Քաթարի հետ ռազմավարական յարաբերութիւններ մշակելու հնարաւորութեան մասին: Ան երէկ ընդունեց նաեւ Թուրքիոյ արտաքին գործերու նախարար Հաքան Ֆիտանը, որուն հետ քննարկեց Սուրիոյ նորագոյն զարգացումները եւ երկկողմանի յարաբերութիւնները: «Թուրք նախարարը պատրաստակամութիւն յայտնեց աջակցելու Սուրիոյ ու մենք կը մտադրենք ռազմավարական յարաբերութիններ կառուցել Անքարայի հետ՝ յանուն տարածաշրջանի ապագային», ըսաւ Շարաա եւ Թուրքիան համարեց «սուրիացիներուն բարեկամը, որ յեղափոխութեան սկիզբէն ի վեր կանգնած էր ժողովուրդին կողքին»: Դիտել տալով, որ յեղափոխութեան տրամաբանութիւնը կը տարբերի պետութեան տրամաբանութենէն, Շարաա վստահեցուց, որ իրենք պիտի արգիլեն Սուրիոյ մէջ ապօրինի զէնքի գոյութիւնը, որովհետեւ այդ կը խախտէ պետութեան կայունութիւնը: Ան մաղթեց նաեւ, որ միջազգային համաձայնութիւն ըլլայ՝ Սուրիոյ նկատմամբ սահմանուած պատժամիջոցները չեղարկելու եւ երկրին ամբողջականութիւնը պահպանելու ուղղութեամբ:
Թուրքիոյ նախագահ Ռեճեպ Թայիպ Էրտողան շեշտեց, որ «ապագայ Սուրիոյ մէջ որեւէ դեր վերապահուած չէ ահաբեկչական կազմակերպութիւններուն՝ ընդ որում «Իսլամական պետութիւն» կազմակերպութեան եւ Քիւրտիստանի աշխատաւորական կուսակցութեան»: Պնդեդելով, որ Անքարա կը զօրակցի Սուրիոյ տարածքային ամբողջականութեան, Էրտողան պատրաստականութիւն յայտնեց անհրաժեշտ օգնութինը տրամադրելու Դամասկոսի նոր իշխանութեան: Իսկ Ռուսիոյ նախագահութիւնը յայտարարեց, թէ Մոսկուա պիտի շարունակէ քաղաքական եւ զինուորական համագործակցութիւնը Դամասկոսի նոր իշխանութիւններուն հետ:
