Լիբանանի հարաւային շրջաններուն մէջ, ըստ երեւոյթին, զինադադարը միակողմանի է միայն: Իսրայէլեան ուժերը երէկ եւս շարունակեցին գործողութիւններու ձեռնարկել լիբանանեան հողի վրայ: Իսրայէլեան զինուորական սարքեր կործանումի աշխատանք իրականացուցին սահմանային Մարուն էլ-Ռասի մէջ, մինչ մերձակայ Պընթ Ժպէյլը ենթարկուեցաւ կրակոցներու: Իսրայէլացի զինուորները բնակարան պայթեցնելու քաղաքականութիւնը շարունակեցին Սուր գաւառի Պուսթան եւ Զալութիէ գիւղերուն մէջ, մինչ բանակին բանբերը քաղաքացիները վերստին զգուշացուց հարաւային գօտիի իրենց տուները վերադառնալէ, հրահանգելով մնալ հեռու:
Կարմիր խաչի միջազգային կոմիտէի եւ Լիբանանի Կարմիր խաչի կազմակերպութեան ջանքերով, երէկ կարելի եղաւ Լիբանան վերադարձնել եօթը անձ, որոնք ձերբակալուած էին իսրայէլեան ուժերուն կողմէ: Ազատ արձակուած մարդիկը բժշկական քննութիւններու համար նախ փոխադրուեցան Սուրի իտալական հիւանդանոցը, ապա Կարմիր խաչը յայտարարեց, թէ անոնք բոլորն ալ առողջ են: Հետեւաբար, եօթը անձերը փոխադրուեցան բանակի հետախուզութեան Սայտայի կեդրոն՝ հարցաքննութեան համար:
