* Աթէնքի մէջ տեղի ունեցած են Հայաստան-Յունաստան երկկողմ ու Հայաստան-Յունաստան-Կիպրոս եռակողմ պաշտպանական խորհրդակցութիւնները: Քննարկուած են պաշտպանական համագործակցութեան ուղղութեամբ 2024 թուականին կատարուած աշխատանքները եւ 2025 թուականի ընելիքները։ Կողմերը արձանագրած են, որ համագործակցութիւնը թէ՛ ծաւալային, թէ՛ բովանդակային առումով զգալի յառաջընթաց արձանագրած է եւ ընդգրկած է այնպիսի կարեւոր ուղղութիւններ, որոնք աւելի երկարաժամկէտ, համակարգային աշխատանք կը պահանջեն։ Քննարկուած են նաեւ պաշտպանութեան ոլորտին մէջ նոր մօտեցումներու եւ չափորոշիչներու ներդրման հարցերը։ Աւարտին ստորագրուած են Հայաստան-Յունաստան երկկողմ եւ Հայաստան-Յունաստան-Կիպրոս եռակողմ պաշտպանական համագործակցութեան 2025 թուականի ծրագրերը, որոնք կ’ընդգրկեն քանի մը տասնեակ միջոցառումներ զինուած ուժերու կենսագործունէութեան բազմաթիւ ոլորտներու մէջ։
* Հայաստանի կառավարութիւնը հաստատակամ է շարունակելու իր ջանքերը՝ խաղաղութեան, անվտանգութեան, կայունութեան եւ համագործակցութեան ցանկալի նպատակներուն հասնելու ուղղութեամբ, յայտնած է Հայաստանի արտաքին գործերու նախարար Արարատ Միրզոյեանը: Ընդգծելով, որ «տարածաշրջանային երկխօսութիւնը փոխշահաւէտ համագործակցութեան հաստատման բանալին է»՝ Միրզոյեան շեշտած է, որ Հայաստանի կառավարութիւնը հանդէս եկած է «Խաղաղութեան Խաչմերուկ» նախաձեռնութեամբ, որ նպատակ ունի զարգացնելու տարածաշրջանի երկիրներուն միջեւ հաղորդակցութիւնը։ Հայաստանի արտաքին քաղաքական գերատեսչութեան ղեկավարը տեղեկացուցած է, որ Հայաստանը եւ Թուրքիան արդէն համաձայնած են համատեղ գնահատել Կիւմրի-Կարս երկաթուղիով սահմանի անցման տեխնիկական պահանջները։ Կիւմրիէն Կարս տանող երկաթուղիով վերջին անգամ 1993 թուականին գնացք անցած է, երկու երկիրներու պետական սահմանը այդ տարի փակուեցաւ։
