Զբօսաշրջային ընկերութիւններու սենտիքաներու համադաշնակցութեան ընդհանուր քարտուղար Ժան Պէյրութի ակնկալեց, որ Նոր տարուայ եւ Սուրբ Ծնունդի տօնական ժամանակաշրջանը ըլլայ «զուտ լիբանանեան», նկատի ունենալով որ ամէնօրեայ դրութեամբ Պէյրութի օդակայան ժամանող աւելի քան 10 հազար ուղեւորներուն մեծամասնութիւնը լիբանանցիներ է, օտարազգիներու գրեթէ ամբողջական բացակայութեամբ: Ըստ Պէյրութիի, արտերկրէն ուղեւորներու հոսքի զարգացումը դրական ազդեցութիւն սկսած է ունենալ մասնաւորաբար ճաշարաններու ոլորտին վրայ, սակայն պանդոկներուն զբաղուածութիւնը տակաւին չի հատեր 20 առ հարիւրի սահմանը: «Երկիրը տակաւին կը գտնուի զինադադարի նախնական 60 օրերուն մէջ, ուստի օդանաւային ընկերութիւնները տակաւին չեն ամբողջացուցած իրենց վերադարձը Պէյրութ», ըսաւ Պէյրութի եւ ակնկալեց, որ յառաջիկայ օրերուն մնացեալ ընկերութիւններ եւս վերսկսին դէպի Պէյրութ ուղեւորութիւնները:
Հանրօգուտ աշխատանքներու եւ փոխադրութեան հարցերու նախարարի պաշտօնակատար Ալի Համիէ իր կարգին հաւաստիացուց, որ օդանաւային ընկերութիւններուն մեծամասնութիւնը վերսկսած է ուղղուիլ Պէյրութ, հետեւաբար օդակայանը տօնական օրերէն առաջ պատրաստ պիտի ըլլայ ծառայելու Լիբանան ժամանող ուղեւորներուն:
