Իր կարգին, Քաղաքացիական անվտանգութեան ծառայութիւնը երէկ յայտարարեց, թէ Պէյրութի հարաւային արուարձաններու Հարէթ Հրէյք թաղամասին մէջ յաւելեալ որոնումներ կատարած է Այուպ շէնքի փլատակներուն տակ՝ յայտնաբերելու համար եօթը անձ, որոնք տակաւին անհետ կորսուած էին 27 Սեպտեմբերին կատարուած իսրայէլեան ռմբակոծութենէն ետք: Ըստ հաղորդագրութեան, մանրակրկիտ որոնումներուն արդիւնքով բացայայտուեցաւ երեք զոհի մարմին, որոնք փոխադրուեցան Պէյրութի կառավարական հիւանդանոց՝ DNA-ի քննութիւններ կատարելու եւ զոհերուն ինքնութիւնը պարզելու նպատակով: Քաղաքացիական անվտանգութեան ծառայութիւնը հաստատեց, որ աշխատանքը պիտի շարունակուի, մինչեւ բոլոր անհետ կորսուած մարդոց ճակատագրի պարզումը:
