Շաբաթ մը ետք կ’ամբողջանայ երկամսեայ պատերազմը դադրեցուցած զինադադարի համաձայնութեան յայտարարութեան առաջին ամիսը, սակայն տակաւին անոր յօդուածներուն գործադրութիւնը չէ կատարելագործուած: Իսրայէլեան ուժերը ոչ միայն դուրս չեն գար լիբանանեան ներթափանցուած տարածքներէն, այլեւ կը շարունակեն նաեւ իրականացնել յաւելեալ պայթումներ եւ ոտնձգութիւններ: Լիբանանի ազգային լրատու գործակալութիւնը հաղորդեց, թէ իսրայէլեան բանակը բնակարաններ պայթեցուցած է սահմանամերձ Նաքուրայի հարաւային թաղամասին, ինչպէս նաեւ Այթարուն եւ Պլիտա գիւղերուն մէջ, պատճառելով նիւթական ծանր վնասներ: Միաժամանակ, իսրայէլեան ուժերը երկօրեայ գործողութիւններէ ետք վերջապէս քաշուեցան Պանի Հայյան գիւղէն: Իսկ հարաւէն ապահովական տեղեկութիւններ նշեցին, թէ Ուատի Հուժէյր շրջանին մէջ գտնուած է ինքնաշարժը քաղաքացիի մը, որ նախանցեալ օր կորսուած էր իսրայէլեան ուժերու տեղակայումի շրջանին մէջ: Ըստ տեղեկութիւններուն, ինքնաշարժին վրայ գտնուած են կրակոցներու հետքեր:
Պատերազմի հետեւանքները վերացնելու աշխատանքներուն ծիրին մէջ, լիբանանեան բանակին հրամանատարութիւնը յայտարարեց, թէ իսրայէլեան յարձակումներու ականատես դարձած շրջաններուն մէջ աշխատանքը կը շարունակուի՝ մաքրելու փողոցներն ու սեփականութիւնները, նաեւ պայթեցնելու չպայթած զինամթերքը, որպէսզի դիւրանայ ժողովուրդին երթեւեկութիւնը, քաղաքացիներէն պահանջելով չմօտենալ նշեալ աշխատանքներուն ականատես դաձող շրջաններուն, նկատի առնելով բազմաթիւ վտանգները:
