Լիբանանեան «Ժատիտ» հեռատեսիլի կայանը երէկ հաղորդեց, թէ Ընկերվար յառաջդիմական կուսակցութեան նախկին առաջնորդ Ուալիտ Ճոմպլաթ կը պատրաստուի երեսփոխանական պատուիրակութեան եւ տիւրզի շէյխերու ընկերակցութեամբ յառաջիկայ օրերուն այցելելու Դամասկոս, տեսակցելու համար իշխանութեան տիրացած ուժի առաջնորդ Ահմատ Շարաայի հետ, շնորհաւորելու համար զայն եւ արծարծելու սուրիական զարգացումները:
Սուրիոյ հարաւային՝ տիւրզիներու ծանրակշիռ բնակութիւն ունեցող Սուէյտէ գաւառին երեւելիները հրապարակեցին յայտարարութիւն մը, որուն մէջ խստիւ զգուշացուցին Սուրիոյ իշխանութեան հասած ուժի ղեկավար Ահմատ Շարաայի հետ կապեր հաստատելու վտանգաւոր հետեւանքներէն: Մեկնաբանելով Սուէյտէ գաւառէն պատուիրակութեան մը Դամասկոս այցելութիւնը եւ Շարաայի հետ տեսակցութիւնը, յայտարարութիւնը շեշտեց, որ պէտք է զերծ մնալ ահաբեկչական ծայրայեղական հոսանքի ներկայացուցիչին հետ համագործակցելէ, նախընտրելով յանձնառու մնալ գաւառի բնակչութեան ազգային ուղղուածութեան ու Սուրիոյ սահմանադրութիւնը փոխելու եւ տիւրզիներուն ու միւս փոքրամասնութիւններուն արդար իրաւունքնեը ապահովելու ջանքերուն: Հաղորդագրութիւնը նոր իշխանութիւնը ամբաստանեց նոր սահմանադրութեան մէջ համադաշնակցային դրութիւնը որդեգրել մերժելու մէջ, Շարաայի հետ տեսակցած տիւրզիները ամբաստանելով 500 հազար տոլարի կաշառք ստանալու մէջ: «Մեր առաջարկած համադաշնակցային դրութիւնը մաս կը կազմէ մեր պայքարին՝ երաշխաւորելու մեր եւ բոլոր սուրիացիներուն իրաւունքները», նշուեցաւ հաղորդագրութեան մէջ, հաւաստիացնելով որ իրենք չեն ծառայեր արտաքին ծրագրերու:
