Հարաւային ուղղութեամբ, իսրայէլեան ուժերը երէկ շարունակեցին դիրքաւորուիլ սուրիական հողի վրայ, ուր իրենց դիրքերը ամրացուցին մանաւանդ բռնագրաւեալ Կոլանի մերձակայ Քնէյթրա գաւառին մէջ, խուզարկեցին բնակարաններ եւ սպառնալիք արձակեցին բնակչութեան: Իսրայէլի պաշտպանութեան նախարար Իսրայէլ Քաց յայտնեց, որ Շէյխ լեռան վրայ իրենց ներկայութիւնը նոր հնարաւորութիւններ կ’ընձեռէ Պեքաայի մէջ Հըզպալլայի շարժումներուն հետեւելու: Իսկ վարչապետ Պենիամին Նեթանիահու բանակին հրահանգեց վերջերս բռնագրաւուած սուրիական հողերուն վրայ մնալ մինչեւ առնուազն 2025-ի աւարտը:
Դամասկոսի նոր իշխանութիւնը այս առումով միջազգային ընտանիքէն պահանջեց քայլերու ձեռնարկել՝ վերջ տալու համար իսրայէլեան բռնութիւններուն եւ բռնագրաւումին:
