Ապահովական զարգացումներու ծիրին մէջ, Համայի Յոյն ուղղափառ եկեղեցին ահազանգեց, թէ անծանօթներ կրակ բացած են առաջնորդարանին վրայ եւ նիւթական վնաս պատճառած մերձակայ գերեզմանատան: Յայտարարութիւնը գոհունակութիւն յայտնեց, որ քաղաքի ոստիկանութիւնը իսկոյն միջամտած է եւ հետաքննութիւն բացած՝ յանցագործները բացայայտելու եւ ձերբակալելու համար:
Սուրիոյ Քաղաքացիական անվտանգութեան ծառայութեան պատասխանատուներէն Ամմար Սալմօ յայտնեց, որ փրկարարները Դամասկոսի հարաւային Սէյիտէ Զէյնապ շրջանի դեղորայքի մթերանոցներէն մէկուն մէջ բացայայտած են ինքնութիւնը անծանօթ շուրջ 20 մարդու աճիւն: Սալմոյի համաձայն, մթերանոցը կը գտնուի Սէյիտէ Զէյնապ ուխտատեղիին մօտ եւ զայն կարելի եղած է բացայայտել քաղաքացիներէն հասած տեղեկութիւններուն շնորհիւ: «Մթերանոցի սառնարանին մէջ բացայայտեցինք աճիւններ եւ մարդկային ոսկորներ: Ըստ երեւոյթին, զոհերը մահացած են շուրջ երկու տարի առաջ», ըսաւ սուրիացի փրկարարը: Իրանի Արտաքին յարաբերութիւններու ռազմավարական խորհուրդի նախագահ Քամալ Խարազի զգուշացուց Սուրիան պառակտելու վտանգներէն եւ նշեց, թէ ապակայունութիւնը կրնայ շուտով անցնիլ Իրաք:
