ՄԱԿ-ի Ապահովութեան խորհուրդը արտակարգ նիստով մը քննարկեց Սուրիոյ զարգացումները եւ կոչ ուղղեց գործադրութեան դնելու քաղաքական ամբողջական հոլովոյթ մը՝ սուրիացիներու գլխաւորութեամբ, ապահովելու համար քաղաքացիներուն կարիքները: ՄԱԿ-ի մէջ Իրանի ներկայացուցիչը շեշտեց, թէ Սուրիոյ ապագան պէտք է վճռուի բացառաբար սուրիացի ժողովուրդին որոշումով, առանց արտաքին միջամտութիւններու: Միացեալ Նահանգներու Արտաքին գործերու նախարարութիւնը յայտարարեց, թէ ամերիկեան միջնորդութեամբ կարելի եղած է մինչեւ շաբաթավերջ երկարաձգել Թուրքիոյ եւ Սուրիոյ մէջ գործող քրտական ուժերուն միջեւ կնքուած զինադադարը: Իսկ տեղահանուածներուն հարցերով զբաղող ՄԱԿ-ի գործակալութիւնը ակնկալեց, որ 2025-ի առաջին կիսուն Սուրիա վերադարձած ըլլայ շուրջ մէկ միլիոն քաղաքացի:
Սուրիոյ մէջ երէկ նկատուեցան բնականոնացումի յաւելեալ քայլեր՝ վերաբացուեցաւ Յորդանանի հետ սահմանային անցակէտը, Կեդրոնական դրամատունը յայտարարեց դրամատնային մեքենաները վերագործարկելու մասին, իսկ Դամասկոսի օդակայանէն վերսկսան օդային թռիչքները դէպի Հալէպ: Իշխանութեան տիրացած ուժի ղեկավար Ահմատ Շարաա Դամասկոսի մէջ երէկ ընդունեց Գերմանիոյ Արտաքին գործերու նախարարութենէն պատուիրակութիւն մը՝ քննարկելու երկկողմանի յարաբերութիւնները եւ Սուրիոյ վիճակը:
