Սկզբունքով 8 Յունուար 2025-ին կայանալիք՝ հանրապետութեան նոր նախագահի ընտրութեան խորհրդարանական նիստին ընդառաջ, «Ժողովրդավարական հանդիպում» խորհրդարանական խմբակցութիւնը երէկ գումարած նիստին ընթացքին որոշեց զօրակցիլ լիբանանեան բանակի հրամանատար զօրավար Ժոզէֆ Աունի թեկնածութեան: Երեսփոխան Թէյմուր Ճոմպլաթի գլխաւորութեամբ եւ նախկին կուսակցապետ Ուալիտ Ճոմպլաթի ներկայութեամբ գումարուած ժողովին ընթացքին, խմբակցութիւնը դատապարտեց զինադադարի իսրայէլեան խախտումները, զինադադարին հետեւող միջազգային ուժերէն պահանջելով ճնշել Թել Աւիւի վրայ՝ դադրեցնելու ոտնձգութիւնները: Ժողովականները իրենց աջակցութիւնը յայտնեցին Թաէֆի համաձայնութեան եւ ՄԱԿ-ի 1701 բանաձեւի ամբողջական գործադրութեան, կոչ ուղղելով անյապաղ սկսելու հարաւի, Պեքաայի եւ հարաւային արուարձաններու վերակառուցումին:
