Նաքուրայի մէջ երէկ վերստին ժողով գումարեց զինադադարի գործադրութեան հետեւող հնգեակը, որուն մաս կը կազմեն լիբանանեան եւ իսրայէլեան բանակները, ԵՈՒՆԻՖԻԼ-ը, Միացեալ Նահանգներն ու Ֆրանսան: Ժողովականները արծարծեցին զինադադարի առաջին տասը օրուան ընթացքին մարտահրաւէրներն ու խախտումները, ինչպէս նաեւ յաջորդ փուլին մանրամասնութիւնները: Ժողովէն ետք, ԵՈՒՆԻՖԻԼ, ամերիկեան ու ֆրանսական դեսպանատուները հրապարակեցին միացեալ հաղորդագրութիւն մը, որուն մէջ հաստատեցին, թէ յանձնախումբը պիտի շարունակէ գումարել հերթական ժողովներ՝ հետեւելու համար զինադադարի գործադրութեան եւ կանխելու խախտումները:
Այսուհանդերձ, իսրայէլեան ուժերը երէկ շարունակեցին զինադադարի սահմանափակ խախտումները ու վերստին բնակարաններ պայթեցուցին Նաքուրայի եւ Քֆարքիլայի մէջ, միաժամանակ իրենց դիրքերէն հրաձգութիւն կատարելով Լիբանանի սահմանային շրջաններուն ուղղութեամբ: Նաքուրայի քաղաքապետ Ապպաս Աուատա ահազանգեց, թէ իսրայէլեան յարձակումին հետեւանքով կործանուած է բնակավայրին 70 առ հարիւրը: Ան նշեց, որ մինչ հանդիպում կը գումարուէր ԵՈՒՆԻՖԻԼ-ի կեդրոնատեղիին մէջ, իսրայէլեան ուժերը տակաւին ներկայ են մերձակայ բլուրներուն վրայ եւ կը կործանեն բնակարանները:
Միջազգային մեկնաբանութիւններուն մէջ, Իրաքի վարչապետ Մոհամմատ Սուտանի եւ Սէուտական Արաբիոյ գահաժառանց իշխան Մոհամմատ պըն Սալման շեշտեցին Լիբանանի մէջ յայտարարուած զինադադարը գործադրելու անհրաժեշտութիւնը, շեշտելով միջազգային հովանաւորութեամբ կնքուած համաձայնութիւնները յարգել: Սէուտական Արաբիոյ մէջ գումարուած տեսակցութեան ընթացքին, երկու ղեկավարները արծարծեցին տարածաշրջանային զարգացումները՝ ներառեալ Սուրիոյ իրադարձութիւնները, եւ համաձայնեցան համակարգել երկու երկիրներուն ջանքերը: Իսկ Ֆրանսայի նախագահ Էմանուէլ Մաքրոն վերահաստատեց իր երկրին աջակցութիւնը Լիբանանին եւ առողջապահական համակարգին:
