Անուղղակիօրէն մեկնաբանելով սուրիացի ապահովական եւ կասկածելի նախկին անձնաւորութիւններու Լիբանան մուտքին մասին տարածուած լուրերը, Ընդհանուր անվտանգութեան ծառայութեան ընդհանուր տնօրէնութիւնը հաղորդագրութեամբ մը յայտարարեց, թէ սահմանային անցակէտերուն վրայ կը գործադրուին լիբանանեան համապատասխան օրէնքները եւ կ’արգիլուի մուտքը բոլոր անոնց, որոնք ենթակայ են լիբանանեան կամ միջազգային դատական հետապնդումի: Ըստ հաղորդագրութեան, Մասնաայի սահմանային անցակէտին վրայ անցնող օրերուն նկատուած խճողումը կը բացայայտէ ոչ թէ քաոսային վիճակ մը, այլ անվտանգութեան խիստ միջոցներուն գործադրումը՝ մանրազննելու Լիբանան մուտք գործողները եւ ստուգելու անոնց ինքնութիւնը՝ կանխելու համար կասկածելիներու գալուստը:
