Լիբանանեան բանակի հրամանատարութիւնը յայտարարեց, թէ զինուորական խումբեր իրենց ռազմական եւ ճարտարապետական սարքերով մուտք գործած են հարաւային Խիամ քաղաքը եւ տեղակայուած են հինգ դիրքերու մէջ, որպէս գործադրութիւն իսրայէլեան պատերազմին վերջ դրած զինադադարի համաձայնութեան: Տեղակայումը իրականացուած է ԵՈՒՆԻՖԻԼ-ի խաղաղապահ ուժերուն ընկերակցութեամբ, մինչ իսրայէլեան ուժերը հեռացած են Խիամի մերձակայ կէտերէն, վերջին ժամերուն քանի մը բնակարան եւս պայթեցնելէ ետք: Բանակին հաղորդագրութիւնը նշեց, որ յառաջիկայ օրերուն զինուորները պիտի շարունակեն իրենց տեղակայումը նոր շրջաններու մէջ, նախ վնասազերծելով պատերազմէն մնացած զինամթերքը եւ ապահովելով քաղաք վերադառնալ պատրաստուող քաղաքացիներուն անվտանգութիւնը: Բանակը ուստի քաղաքացիներէն պահանջեց չմօտենալ կասկածելի իրերուն, այլ անոնց մասին իսկոյն իրազեկել առնչակից մարմինները:
Մինչ լիբանանեան բանակն ու ԵՈՒՆԻՖԻԼ-ի խաղաղապահները մուտք կը գործէին Խիամ եւ այլ շրջաններ՝ գործադրելու զինադադարի համաձայնութիւնը, իսրայէլեան օդուժը կը շարունակէր խախտումները՝ թիրախաւորելով Պընթ Ժպէյլը, Այթարունի ճամբան եւ Պէյթ Լիֆի մէջ երթեւեկող ինքնաշարժ մը: Առոջապահութեան նախարարութեան Արտակարգ գործողութիւններու կեդրոնը յայտարարեց, թէ Պընթ Ժպէյլի մէջ բնակարանի մը թիրախաւորումէն ինկած է երեք զոհ Այթարունի մօտ՝ քաղաքացի մը, իսկ Պէյթ Լիֆի մէջ եղած են վիրաւորներ:
