Սուրիական ներքին քաղաքական զարգացումներուն զուգահեռ, իսրայէլեան բանակը կը շարունակէ գործողութիւնները ինչպէս Կոլանի, այնպէս ալ Սուրիոյ զանազան շրջաններու մէջ: Բանակը յայտարարեց, թէ երէկ աւելի քան 150 թիրախ հարուածած է Սուրիոյ մէջ՝ սուրիական բանակին կարողութիւնները կործանելու միտումով: Իսրայէլեան յատուկ ուժեր երէկ շարունակած են ներթափանցել սահմանային չէզոք գօտիին մէջ, քանի մը քիլոմեթր յառաջանալով Սուրիոյ հարաւային գօտիին մէջ: Ըստ իսրայէլեան կողմին, Սուրիոյ մէջ իրականացուած գործողութիւնը կը նպատակադրէ ամրապնդել սահմանին եւ մերձակայ շրջաններուն անվտանգութիւնը: Իսրայէլեան ռազմական օդանաւերը ծանր ռումբերով ռմբակոծած են մանաւանդ օդային խարիսխներ՝ կործանելով բազմաթիւ ռազմական օդանաւեր եւ սուրիական բանակին զինամթերանոցները: Վարչապետ Պենիամին Նեթանիահու բռնագրաւեալ Կոլանէն յայտնեց, որ Սուրիոյ մէջ իշխանափոխութիւնը Իսրայէլին համար կը ստեղծէ նոր եւ կարեւոր հնարաւորութիւններ:
Ամերիկեան զինուած ուժերու կեդրոնական հրամանատարութիւնը իր կարգին յայտարարեց Սուրիոյ կեդրոնական հատուածին մէջ «Իսլամական պետութիւն» ահաբեկչական կազմակերպութեան աւելի քան 75 թիրախներ հարուածելու մասին:
Իսկ Սուրիոյ հիւսիսային քրտական շրջաններուն մէջ, թրքական անօդաչու սարքեր երէկ գործադրեցին շարք մը յարձակումներ՝ թիրախաւորելով քրտական պաշտպանութեան ուժերուն դիրքերը, մինչ սուրիական թրքամէտ զինեալ կազմակերպութիւններ գետնի վրայ կը յառաջանային Մենպիճ քաղաքին ուղղութեամբ:
