Սուրիական Զինուորական գործողութեանց տնօրէնութեան հրահանգով գործող զինեալ կազմակերպութիւնները նախանցեալ օր գրեթէ առանց կրակոցի մուտք գործեցին Դամասկոս եւ տիրապետեցին կառավարական բոլոր կեդրոններուն: Խումբ մը ընդդիմադիրներ շուտով յայտնուեցան պետական հեռատեսիլի կայանէն եւ յայտարարեցին իշխանափոխութեան մասին: Անոնք մուտք գործեցին նաեւ բանտերը, ուր բանտարկուած են հազարաւորներ, ներառեալ ոմանք, որոնք տասնամեակներ անցուցած են բանտին մէջ: Յատկանշական էին պատկերները մանաւանդ Սէտնայայի բանտէն: Շուտով յայտարարուեցաւ, որ բանտերուն մէջ գտնուած են նաեւ լիբանանցիներ, որոնցմէ 33 տարի բանտարկուած Սալիմ Համաուի երէկ վերջապէս վերադարձաւ Շըքքայի բնկարանը:
