Նոյեմբեր 27-էն սկսեալ, ընդամէնը տասը օրուան ընթացքին հիւսիսէն հարաւ սուրիական բոլոր գաւառներուն տիրապետած Զինուորական գործողութեանց տնօրէնութիւնը եւ նախկին ընդդիմադիր անձնաւորութիւններ այժմ սկսած են համակարգել քաղաքական իշխանափոխութեան փուլերը: Այս առումով, երէկ ժողով մը գումարուեցաւ Ահմատ Շարահի (նախապէս՝ Ապու Մոհամմատ Կոլանի), վարչապետ Մոհամմատ Ժալալիի եւ փրկութեան կառավարութեան նախագահ Մոհամմատ Պաշիրի միջեւ՝ քննարկելու համար իշխանութեան փոխանցումի ընթացակարգը, որպէսզի կարելի ըլլայ խուսափիլ քաոսային դրութեան ստեղծումէն: Հանդիպումին զուգահեռ հաղորդուեցաւ, որ Մոհամմատ Պաշիր պիտի նշանակուի Սուրիոյ անցումային շրջանի վարչապետ՝ կառավարելու համար յաջորդ փուլը: Տապալած իշխանութեան վարչապետ Ժալալի իր կարգին յայտնեց, որ աշխատանք կը տարուի իրաւասութիւնները փոխանցելու փրկութեան անցումային կառավարութեան, խոստանալով յաջորդ փուլին համագործակցիլ նոր վարչապետին հետ՝ լաւապէս տնօրինելու համար երկիրը: «Այս փուլին առաջնահերթութիւն է սուրիացիներուն տարրական պէտքերը գոհացնելը», ըսաւ Ժալալի: Ան պատրաստակամութիւն յայտնեց դիւրացնելու բոլոր թղթածրարներու փոխանցումը նոր իշխանութեանց, աւելցնելով որ անոնք այժմ պատասխանատու պիտի ըլլան արտաքին քաղաքականութեան տնօրինումին:
