Տոհայի մէջ այսօր տեղի պիտի ունենայ Թուրքիոյ, Իրանի եւ Ռուսիոյ արտաքին գործերու նախարարներու ժողով՝ քննարկելու համար սուրիական զարգացումները: Սուրիոյ արտաքին գործերու նախարար Պասսամ Սապպաղ իր իրաքցի պաշտօնակիցին հետ երէկ Պաղտատի մէջ արծարծեց ռազմական եւ քաղաքական իրադարձութիւնները, զանոնք համարելով համայն տարածաշրջանին անվտանգութիւնը վտանգող շարժումներ:
Թուրքիոյ նախագահ Ռեճեպ Թայիպ Էրտողան յայտնեց, որ Ըտլիպը, Հալէպը, Համան ու Հոմսը կը գտնուին սուրիական ընդդիմութիւն տիրապետութեան տակ եւ անոնք կը շարժին դէպի Դամասկոս: «Մենք մեր ձեռքը մեկնած էինք Սուրիոյ նախագահ Պաշշար Ասատին, սակայն ան չպատասխանեց», ըսաւ Էրտողան եւ պատրաստակամութիւն յայտնեց օգնել Լիբանանին՝ վերականգնելու պատերազմին պատճառած աւերը:
Սուրիոյ զարգացումներուն եւ հարաւային Տարաայի մէջ առաջին միջադէպերու մասին տեղեկութիւններու լոյսին տակ, իսրայէլեան բանակը օդային եւ ցամաքային յաւելեալ ուժեր կուտակեց բռնագրաւեալ Կոլանի մէջ՝ առ ի նախապատրաստութիւն հաւանական որեւէ զարգացումի:
Ռուսիոյ «Թասս» լրատու գործակալութիւնը հաղորդեց, որ Դամասկոսի մէջ Ռուսիոյ դեսպանութիւնը Սուրիա գտնուող ռուս քաղաքացիներուն յորդորած է անյապաղ հեռանալ երկրէն: Արտաքին գործերու նախարար Սերկէյ Լաւրովի համաձայն, Սուրիոյ մէջ կայ «մեծ խաղ մը, որուն մասնակից կը դառնան շարք մը ուժեր»:
Հարեւան Իրաքի վարչապետ Մոհամմատ Շիյյահ Սուտանի կարծիք յայտնեց, որ Սուրիոյ զարգացումները կարելի չէ անջատել Կազայի եւ Լիբանանի պատերազմներէն, որոնք վտանգեցին ամբողջ տարածաշրջանը: «Պաղտատի կեցուածքը անփոփոխ է. մենք կը զօրակցինք Սուրիոյ ամբողջականութեան եւ անվտանգութեան ու կը պահանջենք յարգել երկրին գերիշխանութիւնը», ըսաւ Սուտանի: Իսկ Իրաքի ժողովրդային միլիսներու խորհուրդի ղեկավար Ֆէլէհ Ֆայյատ շեշտեց, որ Սուրիան Իրաքի անվտանգութեան շարունակութիւնն է, ուստի անոր ապահովութիւնը կարելի չէ անջատել Իրաքէն: Իրանի արտաքին գործերու նախարար Ապպաս Արաքճի յայտնեց, որ Իրաքի ղեկավարութեան հետ համաձայնած է յաւելեալ խորհրդակցութիւններ կատարել սուրիական զարգացումներուն վերաբերեալ: Նախարարը Թեհրանի պատրաստակամութիւնը յայտնեց անհրաժեշտ միջոցներով օժանդակելու Սուրիոյ կառավարութեան, ժողովուրդին ու բանակին: Իսկ «Ռոյթըրզ» գործակալութիւնը հաղորդեց, որ Իրան կը պատրաստուի զինուորական յաւելեալ խորհրդականներ, հրթիռներ եւ անօդաչու սարքեր ուղարկելու Սուրիա՝ զօրակցելու համար իշխանութիւններուն:
