Գործող կառավարութեան ընդհանուր քարտուղար Մահմուտ Մեքքիէ յայտնեց, որ վարչապետի պաշտօնակատար Նեժիպ Միքաթիի հրաւէրով, նախարարները այսօր առաւօտեան արտակարգ նիստ մը պիտի գումարեն հարաւային Սուր քաղաքի Պենուա Պարաքաթի անուան զօրանոցին մէջ՝ քննարկելու համար յատկապէս վերջերս յայտարարուած զինադադարի համաձայնութեան բոլոր յօդուածներուն գործադրութիւնը եւ խախտումներուն բացառումը: Գործող կառավարութիւնը պիտի արծարծէ նաեւ պատերազմին հետեւանքով փլուզուած կառոյցներուն վնասը արժեւորելու եւ փլատակները մաքրելու թղթածրարը, առ ի պատրաստութիւն վերակառուցումի ծրագրերու գործադրութեան:
Հաղորդակցութեանց միջոցներու նախարարի պաշտօնակատար Ճոնի Քըրմ յայտնեց, որ երկամսեայ պատերազմին հետեւանքով հաղորդակցութեանց ոլորտին կրած վնասներուն ցարդ արժեւորուած մասը կը հասնի 117 միլիոն տոլարի:
