Խոր ցաւով տեղեկացանք, որ գրող, բանաստեղծ, հայագէտ, խմբագիր, հրապարակախօս եւ Հայ դատի եռանդուն նուիրեալ Ասատուր Կիւզէլեան կեանքէն հեռացած է Լոնտոնի մէջ, 92 տարեկան հասակին:
Ողբացեալը ծնած էր 14 Մայիս 1932-ին, Ալեքսանտրեթ նահանգի Սովուգ Օլուգ հայկական գիւղը: Ան հայ ազգային իրականութեան մէջ հանրածանօթ դէմք մը եղած է կրթական, հրապարակագրական, եկեղեցական եւ հասարակական մարզերու մէջ իր տարած աշխատանքով:
1957-ին մեկնած է Հնդկաստան եւ Կալկաթայի Հայոց մարդասիրական ճեմարանին մէջ դասաւանդած է հայագիտական նիւթեր:
1964-ին ընտանեօք փոխադրուած է Լոնտոն, ուր վարած է «Արեգակ» եւ «Լոնտոն» ամսաթերթերու խմբագրութիւնը:
Հրատարակած է չորս գիրք՝ «Համոյ եւ Ֆատիլէ», «Յարատեւող բարեկամութիւն», «Թերթելով մամուլը» եւ «Կը խօսին նամակները»:
Առ ի գնահատանք հայ ժողովուրդին, հայ դպրոցին, հայ մշակոյթին, հայ գրականութեան եւ եկեղեցւոյ մատուցած ծառայութեան, Վազգէն Ա. Ամենայն Հայոց կաթողիկոսը 1982-ին Ասատուր Կիւզէլեանը պարգեւատրած է «Սուրբ Ներսէս Շնորհալի» շքանշանով։ Աւելի ուշ, պարգեւատրուած է Հ.Հ. Սփիւռքի նախարարութեան «Ուիլիամ Սարոյեան» մետալով` հայ գրականութեան, մշակոյթին, նոր սերունդի հայեցի դաստիարակութեան, հայ ժողովուրդին եւ Հայաստանին մատուցած 60-ամեայ ծառայութեան համար:
2012-ին, Հ.Հ. նախագահ Սերժ Սարգսեանի հրամանագրով պարգեւատրուած է «Մովսէս Խորենացի» մետալով` Հայ գրատպութեան 500-ամեակին առիթով, գրականութեան եւ գրահրատարակչութեան զարգացման գործին ներդրած աւանդի համար:
Անդամ է Հնդկաստանի Ասիական Ընկերութեան եւ Հայաստանի Գրողներու Միութեան:
Յիշատակն արդարոյն օրհնութեամբ եղիցի։
Ծանօթ. Ողբացեալ Ասատուր Կիւզէլեանի ծաւալուն կեանքի եւ գործունէութեան «Արարատ» պիտի անդրադառնայ շուտով:
