«Ռոյթըրզ» լրատու գործակալութիւնը հաղորդեց, թէ պաղեստինեան Համաս շարժումը ներքին շրջաբերականով մը կը սպառնայ սպաննել իսրայէլացի գերիները, եթէ իսրայէլեան բանակը զանոնք ազատելու համար իրականացնէ յատուկ գործողութիւն:
Նոյն ծիրին մէջ, իսրայէլեան բանակը յայտարարեց, թէ 14 Փետրուարին հրթիռային դիպուկ հարուած ուղղած է Խան Եունէսի մէջ պաղեստինեան զինուորական կառոյցի մը, իսկ 20 Օգոստոսին անոր մերձակայ շրջանի գետնափոր ուղիներէն գտնուած են իսրայէլացի վեց գերիներու եւ վեց պաղեստինցիներու մարմիններ: Ըստ իսրայէլեան բանակին, գերիներուն մարմիններուն վրայ եղած են փամփուշտի վէրքեր, իսկ պաղեստինցիներուն՝ ոչ: Հետաքննութիւնը եզրակացուցած է, որ պաղեստինցիները գուցէ իսրայէլեան հարուածի պահուն կրակ բացած են գերիներուն վրայ եւ միասնաբար մահացած: «Եթէ իմանայինք, որ այդ շրջանին մէջ կան գերիներ, ապա հաւանաբար չէինք հարուածեր պաղեստինեան կառոյցը», նշեց բանակը:
