ՄԱԿ-ի Ապահովութեան խորհուրդը գումարեց Սուրիոյ հարցի քննարկումի արտակարգ նիստ մը, որուն ընթացքին միջազգային պատուիրակ Կիր Փեթըրսըն ահազանգեց, որ զինեալ կազմակերպութիւններուն գործողութիւնները կը թիրախաւորեն նաեւ հանրային կառոյցներն ու հիւանդանոցները: «Ճգնաժամը կարելի չէ լուծել ռազմական միջոցներով, այլ անհրաժեշտ է քաղաքական ծրագիր մշակել՝ վերջ տալու սուրիական հարցին»: ՄԱԿ-ի մէջ Սուրիոյ մնայուն ներկայացուցիչը իր կարգին դիտել տուաւ, թէ երկրի հիւսիսային շրջաներուն ուղղութեամբ զինեալներուն յարձակումը կարելի պիտի չըլլար իրականացնել առանց թրքական-իսրայէլեան միացեալ հրահանգի: Իսկ Լիբանանի ներկայացուցիչ Հէտի Հէշէմ արաբական խմբաւորումին անունով դատապարտեց Հալէպի դէմ զինեալներուն յարձակումը, ահաբեկչութեան դէմ պայքարին մէջ զօրակցելով Դամասկոսին:
Իրանի արտաքին գործերու նախարար Ապպաս Արաքճի վստահեցուց, որ Թեհրան պիտի ուսումնասիրէ զինուորական ուժեր Սուրիա առաքելու հնարաւորութիւնը, եթէ Դամասկոս այդ մասին դիմում ներկայացնէ Իրանին: Իսկ Իրաքի կառավարութիւնը յայտարարեց, թէ վարչապետ Մոհամմատ Շայյահ Սուտանի Թուրքիոյ նախագահ Ռեճեպ Թայիպ Էրտողանին տեղեկացուցած է, որ Իրաք ձեռնածալ պիտի չմնայ Սուրիոյ մէջ ծաւալող վտանգաւոր իրադարձութիւններուն դիմաց: Սուտանի շեշտած է, թէ հնարաւոր բոլոր միջոցներուն պիտի դիմէ՝ պահպանելու թէ՛ Իրաքի, թէ՛ Սուրիոյ անվտանգութիւնը: Նախապէս, Թուրքիոյ նախագահը իր ռուս պաշտօնակից Վլատիմիր Փութինի հետ հեռաձայնային հաղորդակցութեան ընթացքին շեշտած էր քաղաքական լուծումի ջանքերուն Սուրիոյ կառավարութեան մասնակցութեան անհրաժեշտութիւնը: Էրտողան Անքարայի աջակցութիւնը յայտնած է նաեւ Սուրիոյ ամբողջականութեան եւ հակամարտութեան վերջնական ու արդար լուծումին: Քրեմլին միւս կողմէ հաղորդեց, որ նախագահ Վլատիմիր Փութին Էրտողանին հետ զրոյցի ընթացքին շեշտած է Սուրիոյ պետութեան դէմ զինեալ կազմակերպութիւններուն յարձակումները դադրեցնելու անհրաժեշտութիւնը, առաջարկելով վերադառնալ Մոսկուա-Թեհրան-Անքարա խորհրդակցութեանց եռեակին:
