Սուրիական զինուած ուժերու հրամանատարութիւնը յայտարարեց, թէ Ըտլիպի եւ Համայի զանազան շրջաններու մէջ կը շարունակէ հարուածել զինեալ կազմակերպութիւններուն դիրքերը, գործածելով հրետանային եւ հրթիռային միջոցներ, ինչպէս նաեւ սուրիական եւ ռուսական օդուժը: Ըստ բանակին, «անցնող 24 ժամերուն սպաննուած է շուրջ 200 զինեալ եւ կործանուած են անոնց պատկանող զինամթերանոցներ ու հրամանատարական կէտեր, իսկ շաբաթ մը տեւած մարտերուն ընթացքին մահացած զինեալներուն թիւը հասած է 1600-ի»:
Սուրիական զինեալ կազմակերպութիւնները, միւս կողմէ, յայտարարեցին բանակի երեք հրասայլ կործանելու մասին: Ըստ զինեալներուն, գործողութիւնները շարունակուած են Համայի գիւղական շրջաններուն ուղղութեամբ՝ անօդաչու սարքերու գործածութեամբ: «Քրտական ուժերուն 80 առ հարիւրը Հալէպի նահանգէն քաշուած է դէպի Ռըքքա», ըսին զինեալ կազմակերպութիւնները: Անոնց համաձայն, վերջին մարտերուն ընթացքին վիրաւորուած է նաեւ սուրիական բանակի յատուկ ուժերու հրամանատար Սուհէյլ Հասանը:
Համացանցի վրայ երէկ տարածուած տեսագրութիւն մը ցոյց տուաւ «Դամասկոսի ազատագրութեան խորհուրդ» (նախապէս՝ Ժըպհէթ Նուսրա) զինեալ կազմակերպութեան ղեկավար Ապու Մոհամմատ Կոլանիի Հալէպի պատմական բերդ այցելութիւնը: Նշենք, որ քանի մը օր առաջ Հալէպին տիրապետած զինեալ կազմակերպութիւններուն գլխաւոր ուժն է Կոլանիի գլխաւորած շարժումը: Միացեալ Նահանգներու զինուած ուժերու կեդրոնական հրամանատարութիւնը յայտարարեց, որ Սուրիոյ արելեան շրջանին մէջ դիպուկ հարուածներով թիրախաւորած է զինուորական շարք մը դիրքեր, որոնցմէ վերջերս կրակ բացուած էր ամերիկեան ուժերուն ուղղութեամբ:
