Մարոնի եպիսկոպոսներու խորհուրդը իր ամսական նիստին ընթացքին յոյս յայտնեց, որ զինադադարի համաձայնութիւնը կը գործադրուի, կոչ ուղղելով անյապաղ ընտրելու հանրապետութեան նախագահը, որպէսզի Լիբանան ընթանայ սպասուած բարեկարգումներուն եւ անվտանգութեան ամրապնդումին ուղղութեամբ:
Իսկ Ազգային ազատ հոսանքի նախագահ, երեսփոխան Ժըպրան Պասիլ երէկ այցելեց Հանրապետութեան մուֆթի շէյխ Ապտ էլ-Լաթիֆ Տըրիանին ու յայտնեց, որ սկսած է խորհրդակցութիւններու շարք մը՝ քննարկելու լիբանանեան քաղաքական եւ ապահովական զարգացումները: Պասիլի խօսքով, կարելի չէ հանրապետութեան նոր նախագահի ընտրութիւնը առնչել տարածաշրջանային զարգացումներուն:
Միացեալ Նահանգներու արտաքին գործերու նախարար Անթոնի Պլինքըն ուրախութիւն յայտնեց, որ Լիբանանի մէջ զինադադարը կը գործադրուի, որոշակի խախտումներով հանդերձ:
Ֆրանսայի նախագահ Էմանուէլ Մաքրոն յայտնեց, որ Սէուտական Արաբիոյ գահաժառանգ իշխան Մոհամմատ պըն Սալմանի հետ համաձայնած է աշխատանք տանիլ՝ լիբանանեան բանակին նիւթականով եւ սարքաւորումներով աջակցելու ուղղութեամբ, որպէսզի ան կարենայ երաշխաւորել զինադադարի գործադրութիւնը: Երկու ղեկավարները համաձայնած են նաեւ Յունիսին կազմակերպել պաղեստինեան պետութիւն հաստատելու աշխատանքին նուիրուած համաժողով մը:
