Ապահովական գետնի վրայ, երէկ նուազեցան իսրայէլեան խախտումները, սակայն հակառակորդին ուժերը Խիամի մէջ պայթեցուցին շարք մը բնակարաններ: Իսրայէլեան բանակը սահմանամերձ որոշ գիւղերու բնակիչներէն վերստին պահանջեց չվերադառնալ իրենց տուները, մինչեւ համաձայնութեան ամբողջական գործադրութիւնը: Բանակը յայտարարեց նաեւ սուրիական բանակին մօտ Հըզպալլայի ներկայացուցիչը Դամասկոսի մէջ թիրախաւորելու մասին:
Առողջապահութեան նախարարութիւնը յայտարարեց, թէ նախանցեալ օր Հարիսի ուղղութեամբ կատարուած ռմբակոծումէն ինկած զոհերուն թիւը բարձրացած է վեցի: Իսկ հարաւային Տէյր Սըրիէն գիւղէն գտնուեցաւ Քաղաքացիական անվտանգութեան ծառայութեան զոհուած կամաւորներէն մէկուն մարմինը: Առողջապահութեան նախարարի պաշտօնակատար Ֆիրատ Ապիատ ամփոփեց աւելի քան տարի մը շարունակուած իսրայէլեան յարձակումներուն հետեւանքով գրանցուած մարդկային կորուստները: Անոր համաձայն, 2023-ի 8 Հոկտեմբերէն ի վեր մահացած է 4047 մարդ, վիրաւորուած է 16.593 հոգի:
