Առ ի գործադրութիւն երկամսեայ պատերազմը դադրեցուցած համաձայնութեան, զինադադարին ընթացքը դիտարկող եւ հաւանական խախտումները գրանցող հնգակողմ յանձանախումբը իր աշխատանքները սկզբունքով կը սկսի վաղը՝ Ուրբաթ, առաջին ժողովը գումարելով ԵՈՒՆԻՖԻԼ-ի խաղաղապահ ուժերու հարաւի սահմանային Նաքուրայի կեդրոնակայանին մէջ: Խորհրդարանի նախագահ Նեպիհ Պըրրի մաղթեց, որ յանձնախումբը անյապաղ սկսի աշխատանքի, պահանջելով որ ան որոշումներ չպարտադրէ, այլ պարզապէս Լիբանանին օգնէ՝ իրականացնել սեփական որոշումները: Պըրրի երէկ տեսակցեցաւ արտաքին գործերու նախարարի պաշտօնակատար Ապտալլա Պու Հապիպի եւ խորհրդարանի փոխնախագահ Էլիաս Պու Սաապի հետ: Վերջինս վստահեցուց, որ զինադադարը դիտարկող յանձնախումբին աշխատանքը պիտի սկսի յառաջիկայ օրերուն:
Վարչապետի պաշտօնակատար Նեժիպ Միքաթի իր կարգին յայտնեց, որ գործող կառավարութիւնը Շաբաթ օր իր նիստը պիտի գումարէ հարաւային Սուր քաղաքի Պենուա Պարաքաթի անուան զօրանոցին մէջ:
Միացեալ Նահանգներու նորընտիր նախագահի միջինարեւելեան հարցերու խորհրդական Մասաատ Պուլոս յայտնեց, որ Լիբանանի մէջ յայտարարուած զինադադարի համաձայնութիւնը կը ներառէ զինեալ բոլոր կազմակերպութիւններու ապազինում՝ ներառեալ Լիթանիէն հիւսիս գտնուող շրջաններուն մէջ: Իսկ ամերիկեան ազգային անվտանգութեան հարցերու խորհրդական Ճէյք Սալիվըն Թել Աւիւէն պահանջեց յստակօրէն յայտարարել Լիբանանի հետ կնքուած զինադադարը յարգելու մասին:
