Սուրիոյ նախագահ Պաշշար Ասատ Իրանի արտաքին գործերու նախարար Ապպաս Արաքժին ընդունած ատեն շեշտեց, որ ահաբեկչական ուժերուն աշխուժութիւնը կը բացայայտէ տարածաշրջանը պառակտելու փորձերուն առկայութիւնը: Իսրայէլեան բանակը իր կարգին յայտարարեց, թէ մօտէն կը հետեւի սուրիական զարգացումներուն, վստահեցնելով որ Իրանին պիտի չարտօնէ առիթէն օգտուելով զէնք փոխադրել Հըզպալլային:
«Ռոյթըրզ» լրատու գործակալութիւնը հաղորդեց, որ Միացեալ Նահանգներն ու Արաբական Միացեալ Էմիրութիւնները կը քննարկեն Սուրիոյ նախագահին վրայ սահմանուած պատժամիջոցներու չեղարկումը, եթէ ան ազատ կացուցուի Իրանէն եւ կանխէ Հըզպալլայի զինամատակարարումը: Իրանի յեղափոխական պահակագունդի բանբերը հաւաստիացուց, որ «սուրիական բանակն ու Դիմադրութեան ճակատը ուժգին եւ վճռորոշ հարուածներ պիտի տան Սուրիոյ մէջ Իսրայէլի գործած ոտնձգութիւններուն»:
