Հըզպալլա հաղորդագրութեամբ մը յստակացուց, թէ իսրայէլեան հետեւողական խախտումներուն լոյսին տակ դիմած է ինքնազսպումի՝ գործադրելով զինադադարի համաձայնութիւնը: «Սակայն երբ խախտումները բազմացան, ներառեցին զանազան տեսակի զէնքեր եւ նոր շրջաններ եւ սպաննեցին երկու քաղաքացիներ, ստիպուեցանք զգուշացնող նախնական հակահարուած տալ Քֆարշուպայի բռնագրաւեալ բարձունքներու Ռուէյսէթ էլ-Ալամ դիրքին, որովհետեւ առնչակից կողմերուն հետ մեր բոլոր հաղորդակցութիւնները եւ իսրայէլեան խախտումները կասեցնելու պահանջները մնացին ապարդիւն»:
Իսրայէլեան բանակը իր կարգին Հըզպալլան ամբաստանեց զինադադարի դրութիւնը խախտելու մէջ: Ըստ հակառակորդին, Հըզպալլա հրթիռներ արձակած է Շըպաայի բարձունքներուն ուղղութեամբ: Իսրայէլի արտաքին գործերու նախարար Կէտաուն Սաէր պնդեց, որ իրենք պարզապէս կը գործադրեն համաձայնութիւնը՝ պատասխանելով Հըպալլայի խախտումներուն, իսկ ելեւմուտքի ծայրայեղական նախարարը Հըզպալլային կոչ ուղղեց «իմանալու, թէ հաւասարակշռութիւնը այժմ փոխուած է եւ անցեալին պատահածը դարձեալ պիտի չկրկնուի»: Ուժանիւթի նախարարն ալ շեշտեց, որ իրենք Հըզպալլային «պիտի չարտօնեն վերադառնալ հարաւային Լիբանան եւ վտանգել իսրայէլացի քաղաքացիները»:
Իսրայէլեան լրատուամիջոցներ մինչ այդ հաղորդեցին, թէ ամերիկացի բանագնաց Ամուս Հոքշթայն Թել Աւիւին փոխանցած է նամակ մը, ուր կը նշուի զինադադարի իսրայէլեան խախտումներուն մասին:
Իսրայէլեան խախտումներուն լոյսին տակ, խորհրդարանի նախագահ Նեպիհ Պըրրի զինադադարի գործադրութեան հետեւող միջազգային յանձնախումբէն պահանջեց իսկոյն անցնիլ աշխատանքի եւ կանխել խախտումները: Իսկ վարչապետի պաշտօնակատար Նեժիպ Միքաթի վարչապետարանին մէջ ընդունեց զինադադարը դիտարկող միջազգային յանձնախումբի նախագահ, ամերիկացի զօրավար Ճէսփըր Ճեֆֆըրզը, որուն հետ քննարկեց յանձնախումբին գործունէութիւնը:
