Իսրայէլի եւ Հըզպալլայի միջեւ սեպտեմբերեան պատերազմը դադրեցուցած զինադադարի համաձայնութեան յայտարարութենէն նուազ քան շաբաթ մը երք, իրենց ծաւալով սահմանափակ խախտումներուն թիւը զգալիօրէն բազմացաւ երէկ Լիբանանի հարաւային սահմանային շրջաններուն եւ մերձակայ իսրայէլեան բնակավայրերուն մէջ: Իսրայէլ օդուժը եւ հրետանին անցնող երկու օրերուն բազմաթիւ առիթներով թիրախաւորեց Խիամը, Թալլուսէն եւ այլ շրջաններ: Իսրայէլեան ուժեր երէկ երկրորդ անգամ ըլլալով փորձեցին հրասայլերով մօտենալ Մէյս էլ-Ժապալ գիւղի հիւանդանոցին ուղղութեամբ, մերթ ընդ մերթ արձակելով կրակոցներ: Լիբանանեան բանակի հրամանատարութիւնը երէկ յայտարարեց, թէ Նաքուրայի մէջ գտած է իր ինքնաշարժին մէջ զոհուած սպայի մը մարմինը: Բանակին համաձայն, սպան անհետ կորսուած էր 26 Նոյեմբերէն ի վեր՝ իսրայէլեան յարձակումի հետեւանքով: Պետական անվտանգութեան ծառայութիւնն ալ յայտարարեց, թէ իր ծառայողներէն Մըհտի Խրէյսը զոհուած է Նապաթիէի մէջ իսրայէլեան անօդաչու սարքի հարուածին պատճառով:
