Լիբանանի հարաւային շրջաններուն մէջ իրավիճակը երէկ զգուշաւոր հանդարտ էր, զինադադարի համաձայնութեան իսրայէլեան սահմանափակ խախտումներով: Իսրայէլեան անօդաչու դիտարկող սարքերը երէկ ժամեր շարունակ չհեռացան հարաւի օդային տարածքէն, մինչ լիբանանեան տարածք ներթափանցած ուժերը հրետանիի օգնութեամբ մերթ ընդ մերթ կրակ բացին սահմանային գիւղերուն վրայ՝ թիրախաւորելով քաղաքացիներուն շարժումները: Լրջագոյն միջադէպը տեղի ունեցաւ Խիամ քաղաքին մէջ, ուր իսրայէլացի զինուորները կրակ բացին իրենց մահացած հարազատը թաղող երեք երիտասարդի վրայ եւ զանոնք հեռացուցին գերեզմանատունէն: Թշնամին նաեւ յառաջացաւ սահմանային Մարքապա գիւղի կեդրոնական հրապարակին ուղղութեամբ, ուր փակեց ճամբաները: Իսկ մերձակայ Քֆարքիլայի մէջ արմատախիլ ըրաւ բազմաթիւ ձթենիներ: Երեկոյեան ժամերուն հաղորդուեցաւ, որ Պընթ Ժպէյլի մէջ մարդիկ վիրաւորուած են իսրայէլեան հրաձգութեան պատճառով: Իսրայէլեան բանակը հարաւի սահմանային առաջին գիծի գիւղերուն բնակիչները դարձեալ զգուշացուց այս փուլին իրենց գիւղերն ու տուները վերադառնալու վտանգներէն եւ խստիւ արգիլեց նշեալ գիւղերուն մէջ մարդոց երթեւեկութիւնը՝ երեկոյեան ժամը 5-էն առաւօտեան ժամը 7: Բանակը նշեց, որ «տակաւին տեղակայուած է Լիբանանի հարաւային շրջաններուն մէջ՝ պաշտպանելու համար իսրայէլեան սահմանամերձ բնակավայրերուն բնակչութիւնը»: Իսրայէլեան սպառնալիքներուն լոյսին տակ, սահմանային շարք մը շրջաններու քաղաքապետերն ու գիւղապետերը քաղաքացիներուն կոչ ուղղեցին առայժմ չփորձելու տուն վերադառնալ եւ սպասելու լիբանանեան բանակի ցուցմունքներուն, որպէսզի կարողանան արժանապատիւ վերադառնալ իրենց գիւղերը:
