Իսրայէլեան բանակը յայտարարեց, թէ իր ուժերը Այսրյորդանանի Արիէլ բնակավայրին մօտ ենթարկուած են զինեալ յարձակումի: Ըստ յայտարարութեան, պաղեստինցիներուն կատարած գործողութիւնը թիրախաւորած է հանրակառք մը, որուն հետեւանքով վիրաւորուած է առնուազն ինը զինուոր՝ ներառեալ երեք ծանր պարագայ: Ըստ բանակի ձայնասփիւռի կայանին, ապահովական լայնածաւալ գործողութին մը ձեռնարկուած է Այսրյորդանանի մէջ՝ բացայայտելու համար զոյգ յարձակումներուն հաւանական մասնակիցները: Կարճ ժամանակ ետք, Համաս շարժումի «Քասսամ» զինեալ թեւը ստանձնեց գործողութեան պատասխանատուութիւնը եւ նշեց, թէ իր մարտիկներէն մէկը կրակ բացած է իսրայէլացի զինուորներուն ուղղութեամբ, որոնք հակադարձած են նոյն միջոցներով եւ սպաննած Համասի անդամը: Իսկ իսրայէլեան շարք մը բնակավայրերու ղեկավարները վարչապետին եւ պաշտպանութեան նախարարին կոչ ուղղեցին զինուորական լայնածաւալ գործողութիւն մը կատարելու Այսրյորդանանի մէջ:
Նորվեկիոյ Արտաքին գործերու նախարարութիւնը յայտարարեց, թէ եկեղեցւոյ նախաձեռնութեամբ երէկ տեղի ունեցած է պաղեստինցիներուն զօրակցող ժողովրդային հաւաք, որուն մասնակցած են թագաւորը, կառավարութեան անդամները եւ քաղաքական ուժերը: «Պէտք է վերջ տալ Կազայի պատերազմին եւ համատարած սպանութեան, գործադրելու համար պաղեստինցիներուն իրաւունքները», ըսաւ արտաքին գործերու նախարարը: Ան նաեւ կոչ ուղղեց ոչ միայն զինադադար յայտարարելու Կազայի մէջ, այլ լրջօրէն քննարկելու պաղեստինեան պետութեան յայտնութեան հարցը:
