Տունդարձին եւ անոր ընկերակցող վտանգներուն անդրադարձաւ նաեւ վարչապետի պաշտօնակատար Նեժիպ Միքաթի: Ան քաղաքացիներուն կոչ ուղղեց չաճապարելու, այլ հետեւելու լիբանանեան բանակի ցուցմունքներուն՝ պահպանելու համար սեփական ապահովութիւնը: «Վերադարձող լիբանանցիներուն հոսքը կը բացայայտէ անոնց կառչածութիւնը հողին ու հայրենիքին: Մենք անհամբեր ենք եւ յառաջիկայ օրերուն կը պատրաստուինք գործադրելու բանակի լայնածաւալ տեղակայումին ծրագիրը, որպէսզի բոլոր քաղաքացիները հնարաւորութիւն ունենան անվտանգ վերադառնալ իրենց գիւղերն ու կեցութեան վայրերը», ըսաւ Միքաթի: Ան գործող կառավարութեան արտակարգ նիստէն ետք յանձնառութիւն յայտնեց ՄԱԿ-ի որոշումներուն եւ շեշտեց, որ հարաւային շրջաններուն մէջ ապահովական հեղինակութիւն տրուած է լիբանանեան բանակին:
