ՄԱԿ-ի մէջ Իսրայէլի մնայուն ներկայացուցիչ Տանի Տանոն ակնկալեց, որ կառավարութիւնը շուտով ժողով մը գումարէ՝ քննարկելու համար լիբանանեան ճակատին վրայ զինադադար յայտարարելու համաձայնութիւնը: Այս ծիրին մէջ, ամերիկեան CNN հաղորդեց, որ Իսրայէլի վարչապետին բանբերը կը հաւատայ, որ ապահովական սեղմ կառավարութիւնը պիտի համաձայնի զինադադարի առաջարկին: Այսուհանդերձ, կան պատերազմը չդադրեցնելու եւ Լիբանանի դէմ գործողութիւնները շարունակելու կոչեր եւս: Իսրայէլի ազգային անվտանգութեան հարցերու նախարար Իթմար Պեն Ղաֆիր կոչ ուղղեց դադրեցնելու Հըզպալլայի հետ զինադադարի համաձայնութեան բանակցութիւնները եւ ուժով շարունակելու գործողութիւնները, մինչեւ Հըզպալլայի պարտութիւնը: Մշակոյթի նախարարը նոյնպէս շեշտեց, որ պիտի ընդդիմանայ զինադադարի համաձայնութեան: Իսկ ելեւմուտքի ծայրայեղական նախարարը շեշտեց, թէ «որեւէ համաձայնութիւն պիտի չարժէ նոյնիսկ այն թուղթը, որուն վրայ պիտի գրուի, խոստանալով շարունակել Հըզպալլայի կործանումը»:
