Լիբանան անցնող ժամերուն ականատես դարձաւ ինչպէս իսրայէլեան ծանր հարուածներու եւ յաւելեալ կործանումի, նոյնպէս մօտալուտ զինադադարի մասին շշուկներու: Տեղական եւ արաբական լրատուամիջոցներ երէկ գիշեր պնդեցին, թէ ժամանակաւոր զինադադարի շուրջ համաձայնութիւնը ամբողջացած է եւ կը մնայ միայն ձեւական յայտարարութիւնը, մինչ այլ աղբիւրներ հաղորդեցին, թէ 60 օր երկարող զինադադար մը պիտի յայտարարուի այսօր՝ ամերիկացի եւ ֆրանսացի նախագահներուն նախաձեռնութեամբ: Այսուհանդերձ, Միացեալ Նահանգներու Սպիտակ տան բանբերը շեշտեց, որ բանակցութիւններուն մէջ կայ մեծ յառաջընթաց, սակայն ոչ վերջնական համաձայնութիւն, աւելցնելով որ իրենք պիտի յայտարարեն նման համաձայնութեան մը առկայութեան պարագային:
ՄԱԿ հակամարտող կողմերուն կոչ ուղղեց համաձայնելու զինադադարի առաջարկներուն եւ վերջ տալու արիւնալի պատերազմին: Միջին Արեւելքի հարցով ՄԱԿ-ի ընդհանուր քարտուղարի պատուիրակի բանբեր Մուհաննատ Հէտի Ապահովութեան խորհուրդին առջեւ արտասանած խօսքին մէջ ողջունեց զինադադար յայտարարելու ուղղութեամբ տարուած դիւանագիտական աշխատանքը, հակամարտողներէն պահանջելով վերջ տալ պատերազմին եւ գործադրել ՄԱԿ-ի 1701 բանաձեւին բոլոր յօդուածները:
Լիբանանի արտաքին գործերու նաախարարի պաշտօնակատար Ապտալլա Պու Հապիպ կոչ ուղղեց անյապաղ զինադադար յայտարարելու եւ լիբանանեան բանակէն յաւելեալ ուժեր տեղակայելու երկրի հարաւային հատուածին մէջ: Իսկ խորհրդարանի նախագահ Նեպիհ Պըրրիի այցելուները նշեցին, որ բանակցութիւնները շատ յառաջացած են, ուստի զինադադար կրնայ յայտարարուիլ 36 ժամուան ընթացքին:
Այսուհանդերձ, ինչպէս յաճախ պատահած է Լիբանանի մէջ, զինադադարի վերաբերեալ լաւատեսութիւնը կրնայ շոգիանալ ընդամէնը վայրկեաններու ընթացքին, իրավիճակը վերադարձնելով իր մագլցող դրութեան:
Գերմանիոյ արտաքին գործերու նախարար Անալենա Պերպոք շեշտեց, որ բանակցային վիճակը շատ աւելի մօտ է համաձայնութեան, քան այն ինչ էր քանի մը օրեր կամ շաբաթներ առաջ:
