Երեքշաբթի, 19 Նոյեմբեր 2024-ին, Աթշանէի ասորւոց վանքին մէջ հանդիպում մը տեղի ունեցաւ Ն.Ս.Օ.Տ.Տ. Արամ Ա. Վեհափառ Հայրապետին եւ Ն.Ս. Իգնատիոս Աֆրամ Բ. Պատրիարքին միջեւ: Վեհափառ Հայրապետին կողքին ներկայ էին գերշ. Տ. Շահան արք. Սարգիսեանը, գերշ. Տ. Թորգոմ արք. Տօնոյեանը եւ հոգշ. Տ. Սարգիս վրդ. Աբրահամեանը: Իսկ Աֆրամ Բ. պատրիարքին կողքին ներկայ էին Պէյրութի, Զահլէի եւ Լեռնալիբանանի առաջնորդները:
Վեհափառ Հայրապետը նախ իր ցաւակցութիւնը յայտնեց պատրիարքին՝ Մալապարի ասորի եկեղեցւոյ պատրիարքին վախճանման առիթով: Ան նաեւ հակիրճ կերպով անդրադարձաւ հայ-ասորի-ղպտի եկեղեցիներու միջեւ միջեկեղեցական գործակցութեան ներկայ պատկերին: Աֆրամ պատրիարք, անդրադառնալէ ետք Մալապարի եկեղեցւոյ դիմագրաւած դժուարութիւններուն եւ զանոնք դարմանելու կարելիութիւններուն, իր կարգին շեշտեց միջեկեղեցական գործակցութեան հրամայականը՝ յատկապէս Միջին Արեւելքի ներկայ մարտահրաւէրներու լոյսին տակ: Հանդիպման ընթացքին խօսուեցաւ նաեւ Նիկիոյ Տիեզերական առաջին սուրբ ժողովին 1700-ամեակը նշելու համար տեղի ունեցող աշխատանքներուն մասին:
