Հըզպալլայի երեսփոխաններէն Հասան Ֆատլալլա յայտնեց, որ զինադադարին վերաբերեալ իրենք նկատողութիւններ եւ առաջարկներ ներկայացուցած են խորհրդարանի նախագահին, աւելցնելով որ դրական կը վերաբերին բանակցային ջանքերուն նկատմամբ: Հըզպալլայի ընդհանուր քարտուղար Նայիմ Քասէմ յայտնեց, որ զինադադարի հարցը այժմ կախեալ է իսրայէլացիներէն, յիշեցնելով որ վարչապետ Պենիամին Նեթանիահուի կառավարութիւնը արդէն անգամ մը դրժած էր զինադադարի ամերիկեան-ֆրանսական առաջարկը գործադրելու խոստումը՝ ահաբեկելով կուսակցութեան նախկին ընդհանուր քարտուղար սեյիտ Հասան Նասրալլան: «Այնպէս չէ որ մենք կրակի տակ կը բանակցինք, որովհետեւ իրենք եւս ծանր հարուածներ կը ստանան նոյն միջոցին», ըսաւ Քասէմ՝ աւելցնելով, որ մայրաքաղաք Պէյրութի թիրախաւորումին դիմաց կը թիրախաւորուի Թել Աւիւի կեդրոնը: «Թշնամին կը խորհի, թէ ամէն ինչ պիտի առնէ բանակցութեամբ, սակայն այդ սխալ է», շեշտեց Քասէմ ու հաստատեց, որ իրենք բանակցութեան զուգահեռ կը շարունակեն նաեւ մարտերը: Հըզպալլայի ընդհանուր քարտուղարին խօսքով, կարեւորը ոչ թէ լիբանանեան գիւղերուն մէջ իսրայէլեան ներթափանցումն է, այլ թշնամի ուժերուն կրած ծանր կորուստները: «Մենք կարողութիւն ունինք նոյն թափով երկար ժամանակ կռուելու, իսկ Իսրայէլ չի կրնար մեզի յաղթել կամ իր պայմանները պարտադրել», հաւաստիացուց շէյխ Նայիմ Քասէմ:
