Բանակցային մարաթոնային խորհրդակցութիւններու լոյսին տակ, պատերազմի նախորդ օրերուն հետ բաղդատած, կացութիւնը երէկ համեմատաբար զգուշաւոր հանդարտ էր Պէյրութի եւ հարաւային արուարձաններուն մէջ: Սակայն նոյնը կարելի չէ ըսել հարաւի որոշ շրջաններու մասին, ուր շարունակուեցան թէ՛ օդային հարուածները, թէ՛ ցամաքային գործողութիւնները: Իրավիճակը ծանր էր մանաւանդ հարաւարեւելեան Խիամ քաղաքին շուրջ, ուր իսրայէլեան ուժերը վերստին փորձեցին քաղաքի կեդրոնը հասնիլ արեւելեան, հարաւային եւ հիւսիսային հատուածներէն: Հըզպալլա սակայն յայտարարեց, թէ հրետանային եւ հրթիռային հարուածներով թիրախաւորած է Խիամի մերձակայ շրջաններուն մէջ կուտակուած իսրայէլեան ուժերը՝ խափանելով անոնց քաղաքի կեդրոն մուտքը: Հարաւի բախումներուն ընթացքին անցնող ժամերուն մահացաւ երեք իսրայէլացի զինուոր:
Հըզպալլա երէկ հրթիռներ եւ անօդաչու սարքեր արձակեց նաեւ իսրայէլեան սահմանային բնակավայրերուն եւ Աքքա քաղաքին ուղղութեամբ: Իսկ իսրայէլեան շտապ օգնութիւնը իր կարգին նշեց, թէ խուճապի մատնուած շարք մը քաղաքացիներ փոխադրած է հիւանդանոց: Ի դէպ, իսրայէլեան բանակը յայտարարեց, թէ 2023-ի 7 Հոկտեմբերին սկսած Կազայի, ապա Լիբանանի բախումներուն ընթացքին մահացած զինուորներուն թիւը բարձրացած է 800-ի:
Լիբանանի Տեղեկատուութեան նախարարութիւնը, մամլոյ եւ լրագրողներու սենտիքաները, ինչպէս նաեւ Լսատեսողական լրատուութեան ազգային խորհուրդը ամբողջական զօրակցութիւն յայտնեցին հարաւի ռազմական գօտիին մէջ աշխատող լրագրողներուն՝ ի տես անոնց նկատմամբ արձակուած իսրայէլեան սպառնալիքներուն:
