ՊԱՏՄՈՒԹԵԱՆ ՄԷՋ՝ ԱՅՍՕՐ

19 Նոյեմբեր 2024: Տարուան 324-րդ օրն է (նահանջ տարի)։

2024-ի աւարտին կը մնայ 42 օր։

Դէպքեր – Տօներ

1946 – Աֆղանիստանը, Իսլանտան եւ Շուէտը կ’անդամագրուին Մ.Ա.Կ.-ին:

1969 – Պրազիլի Փելէն կը նշանակէ իր 1000-րդ կոլը:

1992-էն – Տղամարդոց համաշխարհային օր:

1947-էն – Պրազիլի մէջ՝ Դրօշի օր:

1857-էն – Մոնաքոյի ազգային օր:

Ծնունդներ

1711 – Միխայիլ Վասիլեւիչ Լոմոնոսով, ռուս գիտնական, բնախոյզ: Ձեւակերպած է բնութեան մէջ ուժանիւթի պահպանման սկզբունքը։ 1755-ին հիմնած է Մոսկուայի պետական համալսարանը, որ հետագային կոչուած է իր անունով։ Զբաղուած է նաեւ աստղագիտութեամբ՝ յայտնաբերելով Վեներայի մթնոլորտը: Զբաղուած է ռուս ժողովուրդի պատմութեան հարցերով, նկարչութեամբ եւ մասնաւորապէս խճանկարչութեամբ։ Լոմոնոսովի անունով կը կոչուին Ատլանտեան ովկիանոսի ենթամակերեւութային հակահոսանքները եւ Հիւսիսային Սառուցեալ ովկիանոսի ստորջրեայ լեռնաշղթան:

1843 – Յակոբ Պարոնեան, գրող-երգիծաբան եւ լրագրող, 19-րդ դարու երկրորդ կէսի հայ գրականութեան, յատկապէս իրատեսական արձակագրութեան ներկայացուցիչներէն մին։ 1868-ին որպէս դասատու կը պաշտօնավարէ Սկիւտարի ճեմարանը կամ Ճերմակ դպրոցին մէջ, ուր կ’աշակերտէր Պետրոս Դուրեան։ Կ’աշխատակցի «Մեղու» երգիծաթերթին, իսկ յետոյ կը դառնայ անոր խմբագիրը (1872–1874): Կը խմբագրէ «Թատրոն» թերթը։ Կ’աշխատակցի «Մասիս»-ին, ապա «Փորձ» հանդէսին։ Կը հրատարակէ «Խիկար» հանդէսը (1884–1888):

1875 – Միխայիլ Քալինին, Խորհրդային Միութեան առաջին ղեկավարը:

1888 – Խոսէ Ռաուլ Քափապլանքա, քուպացի շախմատիստ:

1894 – Նուցի Ակոնց, ծագումով հայ ռումանացի նկարչուհի:

1917 – Ինտիրա Կանտի, հնդիկ քաղաքական ու պետական գործիչ: Հնդկաստանի վարչապետ 1966–1977 եւ 1980–1984 թուականներուն։

Ճաւահարլալ Ներուի դուստրը։

Մահեր

1993 – Փօլ Մանուկի Կիրակոսեան: Նկարիչ։ 1954-ին մեկնած է Ֆլորանս՝ գեղարուեստի ակադեմիային մէջ կատարելագործուելու համար։ 1961-էն հաստատուած է Պէյրութ։ Ստեղծագործած է դիմանկարի, բնանկարի և բներգական-ներդաշնակ պատկերներ: Պարգեւատրուած է Հայաստանի նկարիչներու միութեան Մարտիրոս Սարեանի անուան մրցանակով։

2001 – Բագրատ Արշակի Ուլուպապեան, գրող, պատմաբան, պատմական գիտութիւններու դոկտոր, բանաստեղծ, արձակագիր, թատերագիր, թարգմանիչ։

1918 – Մաղաքիա արքեպիսկոպոս Օրմանեան, աստուածաբան, հայագէտ, պատմաբան, բանասէր, հրապարակախօս, ազգային պահպանողական ուղղութեան հասարակական գործիչ։ Կ. Պոլսոյ հայոց պատրիարք։

Ձգած է գրական, գիտական, մատենագրական եւ եկեղեցապատմական կոթողային աշխատութիւններ:

1828 – Ֆրանց Շուպերթ, աւստրիացի երգահան:

1887 – Էմմա Լազարուս, ամերիկացի գրող եւ բանաստեղծուհի:

1977 – Նինա Յովսէփեան, հայ դերասանուհի: